Satara Animal Husbandary Department : मागच्या दोन वर्षांत हाहाकार माजवलेल्या लम्पी आजाराने सातारा जिल्ह्यात पुन्हा डोके वर काढले आहे. यामुळे शेतकऱ्यांवर संकट ओढावले आहे. साताऱ्यात सध्या २५० हून जनावरांना याची लागण झाली आहे तर दोन जनावरांचा मृत्यू झाला आहे. याबाबत तातडीने जिल्हा परिषद पशुसंवर्धन विभागाच्या वतीने संसर्ग रोखण्यासाठी उपाययोजना करण्यात येत आहे.

याबाबत जिल्हा पशुसंवर्धन अधिकारी डॉ. विनोद पवार यांनी दिलेल्या माहितीनुसार, जनावरांच्या गोठ्यात गोमाशा, डास यांचा शिरकाव होऊ नये, याची शेतकऱ्यांनी काळजी घ्यावी. बाधित जनावरे अन्य जनावरांच्या कळपात सोडू नयेत. प्रसंगी गोचीड, गोमांशी निर्मूलनासाठी औषध फवारणी करावी. लम्पीसदृश लक्षणे दिसल्यास तत्काळ पशुसंवर्धन विभागाशी संपर्क साधण्याचे आवाहन डॉ. पवार यांनी केले आहे.

सातारा जिल्ह्यात मागील वर्षी जनावरांचा कोरोना म्हणून समजल्या जाणाऱ्या लम्पी रोगाने मोठ्या प्रमाणात जनावरे दगावली होती. यावर खबरदारी म्हणून जिल्हा पशुसंवर्धन विभाग लम्पीचा प्रादुर्भाव रोखण्यासाठी योग्य ती उपाययोजना करत असूनही शेतकऱ्यांचे मोठे नुकसान होत आहे. जिल्ह्यात लसीकरणाची मोहीम प्रभावीपणे राबविण्यात येत आहे.

मात्र, मागच्या दोन आठवड्यात लम्पीचा प्रादुर्भाव पुन्हा वाढू लागला आहे. जावळी व वाई तालुक्यात प्रत्येकी एका जनावराचा लम्पीने मृत्यू झाला असून, कोरेगाव, फलटण, खंडाळा, वाई, जावळी या पाच तालुक्यांत २५१ बाधित जनावरे आढळून आली आहेत. लम्पीचा प्रादुर्भाव वाढू लागल्याने पशुसंवर्धन विभागाकडून युद्धपातळीवर जनावरांचे लसीकरण करण्यात येत असून, दोन लाख ७८ हजार ८१ जनावरांचे लसीकरण करण्यात आले आहे.

लक्षणे ओळखून उपाययोजना

बाधित जनावरांना ताप येणे, चारा खाण्याचे प्रमाण कमी होणे, अंगावर ठिकठिकाणी गाठी येणे अशी लक्षणे दिसून आली आहेत. बाधित जनावरांवर तत्काळ उपचार करण्यात येत असून, लागण झालेल्या जनावरांच्या ठिकाणापासून पाच किलोमीटर परिसरातील जनावरांचे लसीकरण करण्यात येत आहे. जिल्ह्यात जास्तीतजास्त जनावरांचे लसीकरण करण्यासाठी पशुसंवर्धन विभागाने उपाययोजना केल्या आहेत. संबंधित ठिकाणी जंतुनाशक फवारणीही करण्यात येत आहे.