Pune News : राज्यातील पावसाचा जोर कमी-अधिक होत आहे. कोकणातील रत्नागिरी, सिंधुदुर्ग जिल्ह्यांत मंगळवारी (ता. २५) पावसाच्या हलक्या सरी कोसळल्या. पश्चिम महाराष्ट्रातील नाशिक, धुळे, जळगाव जिल्ह्यांत काही ठिकाणी मध्यम पाऊस पडला. याशिवाय उर्वरित राज्यात बहुतांश ठिकाणी पावसाने उघडीप दिली आहे.

मंगळवारी (ता. २५) दिवसभर अनेक ठिकाणी ऊन पडले होते. शेतकऱ्यांना पावसाची प्रतीक्षा कायम आहे. गेल्या तीन ते चार दिवसांपूर्वी कोकणात धो-धो पाऊस पडल्यानंतर त्याचा जोर कमी झाला आहे.

मंगळवारी सकाळी आठ वाजेपर्यंत रत्नागिरीतील आंबलोली येथे सर्वाधिक ९८.५ मिलिमीटर पाऊस पडल्याची नोंद झाली. या पावसामुळे कोकणात भात खाचरे भरून वाहत आहेत. लवकरच भात लागवड होईल, अशी शक्यता शेतकरी व्यक्त करत आहेत.

खानदेशातही तुरळक ठिकाणी हलक्या सरी बरसत आहेत. त्यामुळे कापूस, सोयाबीन पिकांना दिलासा मिळू लागला आहे. अनेक ठिकाणी पेरण्या वेगात सुरू आहेत. नाशिक भागातही पावसाने चांगली हजेरी लावली आहे. या पावसामुळे (Rain) विहीर, बोअरवेलच्या पाणी पातळीत वाढ होऊन पिण्याच्या पाण्याचा प्रश्न काही प्रमाणात कमी झाला आहे.

नगर जिल्ह्यातही नेवासा भागात हलका पाऊस पडला. पुणे जिल्ह्यात ढगाळ वातावरण असून अधूनमधून ऊन पडत आहे. मराठवाड्यातील छत्रपती संभाजीनगर जिल्ह्यात तुरळक ठिकाणी पाऊस पडला.

जालना (Jalna) जिल्ह्यात काही प्रमाणात ढगाळ वातावरण होते. काही ठिकाणी अधूनमधून पावसाचा शिडकावा झाला. बीड, लातूर, धाराशिव, नांदेड, परभणी, हिंगोली जिल्ह्यांत पावसाने चांगलीच उघडीप दिली आहे. यामुळे पेरण्यांची लगबग वेगात सुरू आहे.

पूर्व विदर्भात पेरण्या खोळंबल्या

विदर्भात बुलडाणा, वाशीम, अमरावती आणि यवतमाळ जिल्ह्यांत पावसाच्या काही ठिकाणी हलक्या सरी बरसल्या. तर वर्धा, नागपूर, भंडारा, गोंदिया, चंद्रपूर, गडचिरोली जिल्ह्यांत पावसासाठी पोषक वातावरण नसल्याने शेतकऱ्यांच्या पेरण्या खोळंबल्याची स्थिती आहे.

मंगळवारी (ता.२५) सकाळी आठ वाजेपर्यंतचा मंडलनिहाय पाऊस (मिमी) : स्रोत कृषी विभाग

माखजन ६७, सौदल ६५, अंबेरी ६६, वेतोरे ७५, पिंगुली ६६, वेहेलगाव ८३, विंचूर ८८, देवळा ६७, लोहनेर ६७, ब्राम्हणवेल ७०, पिंपळगाव ६५.