Nashik News : नाशिक कृषी उत्पन्न बाजार समितीचे सभापती माजी खासदार देविदास पिंगळे यांच्या विरोधात दखल करण्यात आलेला अविश्‍वास ठराव मंगळवारी (ता. ११) मंजूर करण्यात आला आहे. नवीन सभापती निगडीपर्यंत बाजार समितीचे उपसभापती विनायक माळेकर यांची प्रभारी सभापतिपदी निवड करण्यात आली आहे.

सभापती पिंगळे हे नाशिक बाजार समिती कामकाजात मनमानी पद्धतीने कामकाज करत असल्याच्या आरोप संचालकांचा होता. विशेष म्हणजे पिंगळे यांच्या गटातून निवडून आलेले ९ सदस्य विरोधात गेले. त्यामुळे कट्टर विरोधक असलेले माजी सभापती शिवाजी चुंभळे यांचे ६ व पिंगळे गटातून आलेले ९ अशा १५ संचालकांनी जिल्हाधिकारी जलज शर्मा यांच्याकडे सोमवारी (ता. ३) अविश्‍वास ठराव दाखल केला होता.

त्यानंतर मंगळवारी बाजार समितीच्या प्रशासकीय इमारतीत प्राधिकृत अधिकारी तथा उपजिल्हा निवडणूक अधिकारी, नाशिक डॉ. शशिकांत मंगरुळे यांच्या अध्यक्षतेखाली व बाजार समितीचे सचिव प्रकाश घोलप यांच्या उपस्थितीत विशेष सभा पार पडली. यात १८ पैकी ३ संचालक अनुक्रमे देविदास पिंगळे, नलिनी कड आणि उत्तम खांडबहाले गैरहजर होते.

१५ संचालकांनी मतदानात अविश्‍वास ठरावाच्या बाजूने हात उंच करून मतदान केले. त्यानुसार हा ठराव डॉ. मंगरुळे यांनी मंजूर करून, ठरावाची प्रत जिल्हाधिकारी आणि उपनिबंधक कार्यालयाकडे पाठविण्यात आली आहे. आता सभापती कोण होणार याकडे सर्वांचेच लक्ष लागून राहिले आहेत. नवीन सभापती निगडीपर्यंत उपसभापती विनायक माळेकर यांची प्रभारी सभापतिपदी निवड करण्यात आली आहे.

पिंगळे यांना धक्का देत सत्तांतर ...

अविश्‍वास ठराव दाखल केल्यानंतर १० संचालक सहलीसाठी परदेशात पाठवले होते. ते सोमवारी सायंकाळी नाशिकमध्ये परतले. तर काही देवदर्शनासाठी गेलेले होते. शिवाजी चुंभळे यांचा नुकताच भाजपमध्ये प्रवेश झाला. त्यानंतर भाजपच्या मदतीने चुंभळे यांनी बाजार समितीमध्ये पिंगळे यांना धक्का देत सत्तांतर घडले आहे.