Dharashiv News : वीजबिल भरणा केंद्रावर रांगेत उभे राहण्याचे कष्ट व वेळ वाचावे म्हणून ‘महावितरण’च्या ऑनलाइन पद्धतीने वीजबिल भरण्याच्या हाकेला लातूर परिमंडलातील वीजग्राहकांमधून चांगला प्रतिसाद मिळत आहे.

मार्च महिन्यात लातूर परिमंडलातील सुमारे चार लाख ६९ हजार ८९४ वीजग्राहकांनी १४५ कोटी १९ लाख रुपयांचे वीजबिल ऑनलाइन पद्धतीने भरले आहे. यात बीड, धाराशिव या जिल्ह्यांच्या तुलनेत लातूर जिल्ह्याचे पाऊल पुढे असल्याचे दिसून येत आहे.ग्राहकाभिमुख पाऊल टाकत वीजग्राहकांसाठी मोबाईल ॲपसह विविध सेवा उपलब्ध करून दिल्यामुळे वीजग्राहकही ऑनलाइन वीजबिल भरण्यास वाढती पसंती देत आहेत.

लातूर परिमंडलांतर्गत ३ लाख ३३ हजार ६९५ वीजग्राहकांनी फेब्रुवारी महिन्यात ७१ कोटी ५६ लाख रुपयांच्या वीजबिलांचा ऑनलाइन पद्धतीने भरणा केला. यामध्ये लातूर जिल्ह्यातील १ लाख ६३ हजार १४ वीजग्राहकांनी ३४ कोटी २३ लाख रुपयांचा, बीड जिल्ह्यातील ९४ हजार ९४५ वीजग्राहकांनी २१ कोटी २३ लाख रुपयांचा, तर धाराशिव जिल्ह्यातील ७५ हजार ७३६ वीजग्राहकांनी १६ कोटी १० लाख रुपयांचा वीजबिल भरणा केला.

मार्च महिन्यात परिमंडलातील ४ लाख ६९ हजार ८९४ वीजग्राहकांनी १४५ कोटी १९ लाख रुपयांचा ऑनलाइन भरणा केला आहे. यामध्ये लातूर जिल्ह्यातील २ लाख वीजग्राहकांनी ७१ कोटी रुपयांचा, बीड जिल्ह्यातील १ लाख वीजग्राहकांनी ४१ कोटी २१ लाख रुपयांचा, धाराशिव जिल्ह्यातील १ लाख वीजग्राहकांनी ३२ कोटी रुपयांचा वीजबिल भरणा केल्याचा समावेश आहे

इतक्या रकमेचा झाला भरणा (आकडे कोटीत)

महिना लातूर बीड धाराशिव

फेब्रुवारी ३४.२३ २१.२३ १६.१०

मार्च ७१.६२ ४१.२१ ३२.३५

वीजबिलामध्ये ०.२५ टक्के सूट

ग्राहकांना वीजबिलाचे ऑनलाइन पेमेंट सुलभतेने करता यावे व त्यांना प्रोत्साहन मिळावे, यासाठी क्रेडिट कार्ड वगळता नेट बँकिंग, डिजिटल वॉलेट, कॅश कार्ड, डेबिट कार्ड व यूपीआय पद्धतीने वीजबिल भरल्यास सेवा निःशुल्क आहे.

तसेच ऑनलाइन पेमेंट केल्यास वीजबिलात ५०० रुपयांच्या मर्यादेत ०.२५ टक्के सवलत मिळते. वीजबिलाचे ऑनलाइन पेमेंट केल्यास ग्राहकांना त्यांच्या नोंदणीकृत मोबाईलवर एसएमएसद्वारे त्वरित पोचपावती मिळते. तसेच संकेतस्थळावर ‘पेमेंट हिस्टरी’ तपासल्यास वीजबिल भरणा तपशील व पावतीही उपलब्ध होते.