Bribe Case Kolhapur : आजरा येथील उपअधीक्षक भूमी अभिलेख कार्यालयातील निवास वसंत पाटील (वय ४३, सध्या रा. सामंत कॉम्प्लेक्स, प्राथमिक आरोग्य केंद्राजवळ, आजरा, मूळ कसबा वाळवा, ता. राधानगरी) याला सहा हजारांची लाच घेताना लाचलुचपत प्रतिबंधक विभागाच्या अधिकाऱ्यांनी पकडले. प्रॉपर्टी कार्डवर नाव लावून देण्यासाठी त्याने लाच मागितली होती. सायंकाळी चारच्या सुमारास भूमी अभिलेखच्या येथील कार्यालयातच कारवाई करण्यात आली.

याबाबत लाचलुचपत प्रतिबंधक विभागाने दिलेल्या माहितीनुसार, तक्रारदार कोल्हापूर (हनुमाननगर, पाचगाव रोड) येथील आहेत. त्यांच्या मातोश्रींच्या मामाला वारस नाही. त्यामुळे त्यांनी त्यांची चिमणे (ता. आजरा) येथील मिळकत तक्रारदारांच्या आईच्या नावे केली होती.

तक्रारदारांच्या आईचे निधन झाले. त्यांना मृत्यूपत्राद्वारे मिळालेल्या मिळकतीमधील प्रॉपर्टी कार्डाला वारसा हक्काने तक्रारदार यांचे तसेच त्यांचे वडील व भाऊ यांचे नावे लावायचे होते.

निमतानदार पाटीलने त्यासाठी तक्रारदाराकडे सहा हजारांची मागणी केली होती. मुदत संपूनही पाटील नावे नोंद करण्याबाबत टाळाटाळ करत होता.

तक्रारदाराचा याबाबत पाठपुरावा सुरू होता. त्यांनी याबाबतची तक्रार लाचलुचपत प्रतिबंधक विभागाकडे केली होती.

लाचलुचपत' विभागाने पाटील याला लाच घेताना पकडले. या विभागाचे पोलीस निरीक्षक बापू साळुंखे, सहायक निरीक्षक प्रकाश भंडारे, पोलीस नाईक सुनील घोसाळकर, संदीप काशीद, विष्णू गुरव, सचिन पाटील यांनी ही कारवाई केली.