ॲग्रोवन वृत्तसेवा

Nagpur News : नागपूर ः भुजलातील पातळीसोबतच सिंचन क्षेत्रात वाढीच्या उद्देशाने तलाव व साठवणूक बंधाऱ्यांची कामे केली जातात. जिल्ह्यात ४७० तलाव आहेत. परंतु या तलावांतील गाळ काढण्यासह इतरही कामांकडे दुर्लक्ष झाल्याने सिंचन क्षमता कशी वाढणार ? असा प्रश्‍न शेतकऱ्यांमधून उपस्थित केला जात आहे.

जिल्ह्यात १३७ लघु सिंचन लताव, ६० पाझर तलाव, ३७ गावतलाव, ३४ मालगुजारी तलाव, २४ साठवण तलाव असे ४७० तलाव आहेत. त्यासोबतच ८८७ साठवण बंधारे, ७२८ कोल्हापुरी बंधारे आहेत. तलाव व बंधाऱ्यांची संख्या विचारात घेता जिल्ह्यातील सिंचन क्षेत्रात वाढीची अपेक्षा होती. परंतु, तलाव व बंधाऱ्यात मोठ्या प्रमाणात गाळ साचला आहे. परिणामी त्यांची साठवण क्षमता कमी झाल्याने सिंचन क्षेत्रातील अपेक्षित वाढीला ब्रेक लागला आहे. जिल्हा परिषदेच्या सिंचन विभागाकडे देखभाल व दुरुस्तीची जबाबदारी आहे. परंतु तलावातील गाळ काढण्यासाठी निधी नाही, अशा परिस्थितीत सिंचन क्षमता वाढणार कशी ? असा प्रश्‍न उपस्थित केला जात आहे.

अतिवृष्टी काळात तलावाचे पाणी शेतात शिरल्याने नुकसान होते. या नुकसानग्रस्तांना शासनाकडून मदत मिळाली नसल्याचाही आरोप आहे. शासनाकडून प्रस्ताव पाठविले जातात. परंतु मदतीबाबत कोणताच निर्णय होत नाही, अशी स्थिती आहे.

गेल्या दोन वर्षातील पावसाळ्यात अतिवृष्टी व पुरामुळे तलावांचे नुकसान झाले. ४७० तलावांपैकी १३७ तलावांची दुरुस्ती आवश्‍यक होती. यासाठी वेळोवेळी शासनाकडे निधीची मागणी करण्यात आली. परंतु निधी उपलब्ध झाला नाही.

दहा वर्षांपूर्वी १५० कोटींचा प्रस्ताव

तलाव व बंधाऱ्यातील गाळ काढण्यासाठी १५० कोटींचा निधी द्यावा, असा प्रस्ताव जिल्हा परिषदेच्या जलव्यवस्थापन व स्वच्छता समितीने दहा वर्षांपूर्वी राज्य सरकारकडे पाठविला होता. परंतु, तो प्रलंबित आहे, जिल्हा नियोजन समितीकडूनही मागणीनुसार निधी उपलब्ध होत नसल्याचे चित्र आहे.

...असे आहेत तलाव

लघु सिंचन १३४

पाझर तलाव ६०

गाव तलाव ३९

तलाव २९४

साठवण तलाव २४