Pune News : काही दिवसांपूर्वीच राज्यातील मराठवाड्यासह विदर्भात भूकंपाचे सौम्य धक्के बसले होते. त्यामुळे कोणतेही नुकसान झाले नव्हते. मात्र लोक भयभीत झाले होते. यानंतर आता साताऱ्यातील कोयना नगर परिसर भूकंपाच्या धक्कांनी हादरला आहे. बुधवारी (ता.१७) दुपारी आलेल्या २.८ रिश्टर स्केल तीव्रतेच्या भूकंपामुळे नागरिकांमध्ये भीतीचे वातावरण पसरले आहे. या भूकंपाची नोंद कोयना भूकंप मापन केंद्रावर झाली.

मिळालेल्या माहितीनुसार पाटण तालुक्यातील कोयनानगर व पोफळी परिसराला बुधवारी दुपारी भूकंपाच्या धक्कांनी परिसर हादरला. यामुळे परिसरात भीती पसरली. तर भूकंपाच्या धक्क्यामुळे कुठेही नुकसान झाले नसून भूकंपाचा केंद्रबिंदू कोयनेपासून १३ किलोमीटर अंतरावर हेळवाक गावाच्या पश्चिमेला आहे. तर भूकंपाची खोली १५ किलोमीटर खोल असल्याची नोंद झाली आहे.

रत्नागिरी जिल्ह्यात हादरे

भूकंपाच्या धक्क्यामुळे साताऱ्यातील पाटण तालुका आणि कोयना नगरमध्ये हादरे बसले आहेत. तर २.८ रिश्टर स्केल तीव्रतेच्या भूकंपाचे धक्के रत्नागिरी जिल्ह्यातील चिपळूण तालुक्यातही बसले आहेत. पोफळी परिसर यामुळे हादरला.

धरणाला धोका नाही

कोयना धरण परिसरात बुधवारी आलेल्या भूकंपाचा कोणताही धोका कोयना धरणाला नसल्याची माहिती धरण व्यवस्थापनाने दिली आहे. तसेच भूकंपाचा धक्का सौम्य असल्यानं धरणाचे कोणतेही नुकसान झालेले नाही असेही धरण व्यवस्थापनाने सांगितले आहे.

जानेवारीतही भूकंपाचे धक्के

कोयना धरण परिसरात याआधी अनेकदा भूकंपाच्या धक्के बसले आहेत. याच्याआगोदर जानेवारीत देखील येथे भूकंपाचे सौम्य धक्के जाणवले होते. २८ जानेवारीला धरण परिसरात ३.१ रिश्टर स्केल तीव्रतेचा भूकंप झाला होता.