Nagar News : अकोले तालुक्यात हिरड्याची खरेदी करावी, दुधाला किमान ३४ रुपये हमी दर द्यावा, राहत्या घरांच्या तळ जमिनी शेतकऱ्यांच्या नावे करावीत यासह अन्य मागण्यासाठी गुरुवारी (ता. ३०) अकोले (जि. नगर) येथे किसान सभेतर्फे डॉ. अजित नवले यांच्या नेतृत्वाखाली मोर्चा काढण्यात आला. या वेळी दूध ओतून सरकारचा निषेध केला.

अकोले तालुक्यात हिरड्याची सरकारी खरेदी करण्याची मागणी मान्य करण्यात आली असून, यासाठी आवश्यक आलेल्या १०६ पेसा गावांचे ठराव करण्यात आले आहे. त्याची तातडीने अंमलबजावणी करावी, दुधाला सध्या अत्यंत कमी दर मिळत आहे.

त्यामुळे दूध उत्पादक शेतकऱ्यांचे नुकसान होत असून, दूध संघ चालकांकडून मनमानी करत सामूहिक लूट करत आहेत. शेतकऱ्यांची दूध दराबाबत होणारी पिळवणूक थांबावी, दुधाला किमान ३४ रुपये दर मिळावा,

राहत्या घरांच्या तळ जमिनी शेतकऱ्यांच्या नावे करण्यासाठी केलेली प्रकरणे तपासावीत यासाठी तहसील कार्यालयावर किसान सभेचे सरचिटणीस डॉ. नवले यांच्या नेतृत्वाखाली मोर्चा काढण्यात आला. प्रशासनाला मागण्याचे निवेदन दिल्यावर तातडीने कार्यवाही करण्याचे आश्‍वासन दिले.

आंदोलनात सदाशिव साबळे, नामदेव भांगरे, एकनाथ मेंगाळ, राजाराम गंभिरे, भीमा मुठे, शिवराम लहामटे, तुळशीराम कातोरे, शेतकरी मोठ्या संख्येने सहभागी झाले होते.