Beed News : तालुक्यामध्ये मागील वर्षीच्या तुलनेत यंदा कमी प्रमाणात खरिपाची पेरणी होणार असून कृषी विभागाच्या प्रस्तावित आकडेवारीनुसार तालुक्यात एकूण ६१ हजार ६२० हेक्टरवर खरीप हंगामाची पेरणी होणार असल्याचा अंदाज व्यक्त करण्यात आला आहे.

माजलगाव तालुक्यात खरीप हंगामाचे ७८ हजार ७७८ हेक्टर खरीप पेरणीलायक क्षेत्र आहे. मागील वर्षीच्या खरिपात ६४ हजार हेक्टरवर पेरणी झाली होती. यावर्षी प्रस्तावित पेरणीची आकडेवारी तालुका कृषी कार्यालयाने जाहीर केली असून एकूण ६१ हजार ६२० हेक्टरवर खरीप हंगामातील बाजरी, तूर, मूग, उडीद, सोयाबीन, कापूस आदी पिकांची लागवड शेतकरी करणार आहेत.

कधी नव्हे तर यावर्षी मे महिन्यातच अवकाळी तसेच मॉन्सूनपूर्व पाऊस बरसल्यामुळे कांदा उत्पादक शेतकऱ्यांना संकटाचा सामना करावा लागला. परंतु, आता आठ ते दहा दिवसांपासून पावसाने काहीशी उघडीप दिल्यानंतर मात्र शेतकऱ्यांनी पेरणीपूर्व मशागतींची कामे आटोपली असून काही भागात आजही ही कामे सुरूच असल्याचे चित्र आहे.

दरम्यान, पेरणीसाठी मोठ्या पावसाची प्रतिक्षा असून पेरणीयोग्य पाउस झाल्याशिवाय पेरणी करू नका, असे आवाहन कृषी विभागाच्या वतीने करण्यात येत आहे.

गतवर्षीचा पेरा (हेक्टरमध्ये)

बाजरी ३५७

तूर २ हजार ४३४

मुग ३०९

उडीद १६

सोयाबीन ३३ हजार १२३

कापुस २७ हजार ८३२

यंदाचे प्रस्तावित क्षेत्र

बाजरी २५०

तुर ३०००

मुग ३५०

उडीद १६

सोयाबीन ३० हजार

कापुस २८ हजार