Monsoon Season : यंदाच्या हंगामात खरिप पेरणी खालील वर्षाच्या तुलनेत लक्षणीय वाढू शकते, असा अंदाज पत मुल्यांकन संस्था आयसीआरएने वर्तवला आहे. देशात मॉन्सून हंगामात पावसाने चांगली हजेरी लावली आहे. त्यामुळे जुलैच्या पहिल्या आठवड्यापासूनच पेरणीने गती घेतली. त्यामुळे खरीप हंगामात पेरणी क्षेत्र वाढण्याची चिन्हं दिसत आहेत. 

पावसाच्या हजेरीने खरीप पेरणीला अनुकूल स्थिती असल्याने जुलै २०२५ अखेर ७६ टक्के क्षेत्रावर पेरणी पूर्ण झाली आहे. मागील वर्षाच्या तुलनेत पेरणी क्षेत्रात ४ टक्क्यांनी वाढ झाली आहे, असे आयसीआरएने ताज्या अहवालात म्हटले आहे.

जून आणि जुलै या पावसाळी महिन्यांमध्ये खरिप पिकांची पेरणी होते. यामध्ये मुख्यतः मूग, भात आणि मका या पिकांचा समावेश असतो. देशात ऑगस्ट व सप्टेंबर महिन्यात हवामान विभागाने सरासरीपेक्षा जास्त पावसाचा अंदाज वर्तविलेला आहे. त्यामुळे खरिप पेरणीला आणखी चालना मिळेल, तसेच जलसाठ्यांच्या पुनर्भरणालाही मदत होईल. याचा लाभ रब्बी हंगामातील (ऑक्टोबर ते मार्च) पेरणीस मिळेल, असेही अहवालात नमूद करण्यात आले आहे.

आयसीआरएच्या माहितीनुसार, भारतात जुलै २०२५ मध्ये सरासरीपेक्षा जास्त पाऊस झाला. संपूर्ण नैऋत्य मोसमी पावसाळ्यातील पावसाचे प्रमाण दीर्घकालीन सरासरीच्या १०६ टक्क्यांपेक्षा जास्त राहील, असा अंदाजही अहवालात व्यक्त करण्यात आला आहे. २०२५-२६ च्या पहिल्या तिमाहीत कृषी, वनीकरण आणि मत्स्य व्यवसाय क्षेत्रातील एकूण मूल्यवाढ (जीव्हीए) सुमारे ४.५ टक्के राहील, असा अंदाज आयसीआरएने व्यक्त केला आहे.

तसेच, मे २०२५ मध्ये ग्रामीण भागातील वास्तविक वेतनवाढ चार टक्क्यांवर पोहोचली असून, जानेवारी २०२५ मध्ये ती शून्यावर होती. त्यामुळे ग्रामीण भागातील ग्राहक मागणी वाढण्यास मदत होईल, असेही अहवालात म्हटले आहे. परंतु पुढील काळात पावसाचं वितरण कसे यावर हंगामातील उत्पादन अवलंबून राहील, असे जाणकारांचे मत आहे.