Buldana News : खामगाव, जि. बुलडाणा :  जिल्ह्यातील खामगाव हे नेहमीच राजकीय घडामो़डींचे केंद्र असते. आता येथील कृषी उत्पन्न बाजार समिती सभापतींसह चार संचालकांनी अजित पवार यांच्या राष्ट्रवादी काँग्रेसमध्ये बुधवारी (ता.१६) प्रवेश घेतला. सुभाष पेसोडे हे बाजार समितीचे सभापती तसेच काँग्रेसचे माजी आमदार दिलीपकुमार सानंदा यांचे खंदे समर्थक म्हणून ओळखले जातात.

बुधवारी रात्री मुंबईत जिल्हयाचे पालकमंत्री मकरंद पाटील, आमदार मनोज कायंदे यांच्या उपस्थितीत खामगाव बाजार समितीचे सभापती सुभाष पेसोडे, संचालक गणेश ताठे, विलाससिंह इंगळे, श्रीकृष्ण टिकार आणि सचिन वानखेडे आदी पदाधिकाऱ्यांनी अजित पवार यांच्याहस्ते प्रवेश स्विकारला. या घडामोडीमुळे खामगावच्या सहकार क्षेत्रात मोठी खळबळ उडाली. तर  बाजार समितीमध्ये आता बदलाचे वारे वाहणार हेही निश्‍चित मानले जात आहे.

खामगाव कृषी उत्पन्न बाजार समिती ही जिल्ह्यातील सर्वाधिक उलाढाल असलेली बाजार समिती आहे. कोट्यवधींचे व्यवहार या ठिकाणी दररोज होत असतात. पाच जणांनी राष्‍ट्रवादी काँग्रेसमध्ये प्रवेश घेतल्याने सहकार क्षेत्रात मोठा भूकंप झाला आहे. शिवाय ग्रामीण भागात काँग्रेसला खिंडारही पडले.

काँग्रेस प्रदेशाध्यक्षांच्या जिल्ह्यात गळती
काँग्रेसला नवे प्रदेशाध्यक्ष हर्षवर्धन सपकाळ हे बुलडाणा जिल्ह्यातील आहेत. त्यांच्याच जिल्ह्यात गेल्या काही दिवसांत अनेक नेत्यांनी काँग्रेसला सोडचिठ्ठी देत दुसऱ्या पक्षात प्रवेश घेतला आहे. ही गळती थांबता थांबेना अशी स्थिती आहे. आता खामगावमध्ये बाजार समितीत गेली अनेक वर्षे सत्ता टिकवून असलेल्या कांँग्रेसला खिंडार पडले. सभापतींसह चार संचालक राष्ट्रवादी काँग्रेसमध्ये दाखल झाले. हे संचालक काँग्रेसचे माजी आमदार सानंदा यांचे समर्थक आहेत.

सानंदाबाबतही गेल्या काही दिवसांत वेळोवेळी पक्ष बदलणार असल्याच्या वावड्या उडालेल्या आहेत. मात्र, त्यांनी आपण काँग्रेसमध्येच असल्याचे स्पष्टीकरणही दिलेले आहे. आता या नव्या घडामोडीनंतर पुन्हा सानंदा यांचे नावसुद्धा चर्चेत आले आहे. तर प्रदेशाध्यक्ष सपकाळ हे स्वजिल्हयात काँग्रेसची गळती रोखण्यासाठी नेमके कुठली भूमिका घेतात हेही अद्याप समोर आलेले नाही.