Indapur News: खडकवासला कालव्यातून इंदापूरसाठी उन्हाळ्यात दोन आवर्तने देण्याबरोबर रब्बीचे आवर्तन सुरू करण्याची मागणी शेतकऱ्यांमधून होत आहे. उसाची तोडणी झाल्यामुळे राखलेल्या खोडव्याला व मोकळ्या झालेल्या शेतात रब्बीतील पिकांना सध्या पाण्याची गरज आहे. यामुळे रब्बीतील आवर्तन तातडीने सुरू करण्याची मागणी शेतकऱ्यांमधून जोर धरत आहे.

गेल्या काही वर्षांपासून खडकवासला कालव्याच्या जीवावरील शेती व्यवसाय अडचणीत आल्याची ओरड शेतकऱ्यांमधून होत आहे. आवर्तनातील अनियमितता, कालवा व वितरिकांची दुरवस्था यामुळे शेतकऱ्यांसाठी कालव्याचे पाणी मृगजळ ठरत आहे. यातच पुण्याची वाढती पाण्याची मागणी व शेती सिंचनापेक्षा पिण्याच्या पाण्याला असलेले प्राधान्य यामुळे टेलला असलेल्या इंदापूरकरांना कालव्याच्या पाण्यापासून वंचित राहावे लागत असल्याची वस्तुस्थिती आहे.

परिणामी कालव्याच्या एकूण लाभक्षेत्राच्या केवळ दहा टक्के क्षेत्र सिंचित होत असल्याची वस्तुस्थिती आहे. कालव्याच्या जीवावर शेती करायची म्हणजे जुगार खेळल्याप्रमाणे असल्याचे मत शेतकरी व्यक्त करत आहेत. कालव्याच्या पाण्याची शाश्वती राहिली नसल्याने, पीक लागवडीचा जुगार खेळायचे धाडस करण्याचे शेतकरी टाळत आहेत. यामुळे शेतकऱ्यांचे अर्थकारण कोलमडले आहे.

यंदा धरणात मुबलक पाणीसाठा असूनही अद्याप पाणी वितरणाचे नियोजन झालेले नाही. कालवा सल्लागार समितीची बैठक अद्यापही झाली नसल्याने शेतकऱ्यांना रब्बी व उन्हाळ्यात किती आवर्तने मिळणार हे अजूनही गुलदस्तात आहे. तर पुण्याने मंजूर पाण्यापेक्षा वाढीव पाणी पुरवठ्याची मागणी केल्याने, इंदापूरकरांच्या तोंडाला पाने पुसण्याचा प्रकार होणार असल्याची जोरदार चर्चा आहे.

सध्या कालव्याच्या लाभक्षेत्रातील विहिरींची पाणीपातळी घटली आहे. तलाव, बंधारे, ओढे, नाले कोरडे पडले आहेत. यामुळे सध्या कालव्याच्या रब्बी आवर्तनाची नितांत गरज आहे. यामुळे कालव्याचे रब्बीचे आवर्तन तातडीने सुरू करण्याबरोबर उन्हाळ्यात दोन आवर्तने देण्याची मागणी शेतकरी करत आहेत.

उपमुख्यमंत्र्यांना शेतकऱ्यांचे साकडे

नुकत्याच्या इंदापूर तालुक्याच्या दौऱ्यावर असलेल्या उपमुख्यमंत्री अजित पवार यांच्याकडे कळस येथे शेतकऱ्यांनी कालव्याच्या पाण्यासाठी साकडे घातले. रब्बीतील आवर्तन सुरू करण्याबरोबर उन्हाळ्यात दोन आवर्तने देण्याची मागणी शेतकऱ्यांनी निवेदनाद्वारे उपमुख्यमंत्र्यांकडे केली.

या वेळी जिल्हा परिषदेच्या माजी सदस्या वैशाली प्रतापराव पाटील, सरपंच सविता सुरेश खारतोडे, भरतराजे भोसले, सुरेश खारतोडे, रमेश खारतोडे, विशाल राजेभोसले, सन्मान पाटील, विजय गावडे, विनोद पोंदकुले यांसह महिला व ग्रामस्थ उपस्थित होते.