Yavatmal News : १७ जणांचे एकत्रित कुटुंब, शिवारात फळपिकांची लागवड आणि उत्पादित फळांची विक्री न करता त्यावर प्रक्रिया करीत ज्यूसची विक्री व त्यातून अवघ्या सहा महिन्यांतच लाखोंची उलाढाल अशा फायदेशीर शेतीचा पॅटर्न जवळा येथील खान कुटुंबीयांनी राबविला आहे.

जवळा येथील नजीर खान हे आठवडी बाजारात चहाची विक्री करीत होते. याच व्यवसायात सातत्य राखत त्यांनी आर्थिक संपन्नता गाठली. आज नागपूर-नांदेड महामार्गावर या कुटुंबीयांची बारा एकर शेती आहे. या कुटुंबात अयुब खान, फिरोज खान तसेच अहमद खान हे तिघे भाऊ व दोन बहिणी याप्रमाणे पाच जणांचा समावेश आहे.

दोन्ही बहिणींचे लग्न झालेले आहे. मात्र त्यानंतरही एकत्रित कुटुंब पद्धतीचा आदर्श सांगणाऱ्या या परिवारात १७ सदस्य आहेत. कुटुंबाच्या शेतीचे सामूहिक पद्धतीने व्यवस्थापन ते करतात. १२ एकर शेतीचे विभाजन केले असता त्यामध्ये १२०० झाडे डाळिंबाची आहेत. ३५० संत्रा, ६० रामफळ, २०० मोसंबी, ६०० पेरू याप्रमाणे लागवड केलेली आहे.

शेती महामार्गालगत असल्याने या संधीचा फायदा घेत या कुटुंबीयांनी शेतीच्या समोरील भागात फळांपासून ज्यूस तयार करण्याचा व्यवसाय सुरू केला. गेल्या १० वर्षांपासून यात सातत्य राखण्यात आले आहे. फळांची बहुतांशी व्यापाऱ्यांना विक्री होते, असे अयुब खान यांनी सांगितले. ज्यूससाठी लागणाऱ्या फळांची खरेदी बाजारातून केली जाते. जानेवारी ते जून या काळात ज्यूसला मागणी अधिक राहते. या सहा महिन्यांतच आठ ते दहा लाख रुपयांची उलाढाल होते, असेही ते म्हणाले.