Parbhani News : वसंतराव नाईक मराठवाडा कृषी विद्यापीठातील परभणी येथील अन्नतंत्र महाविद्यालयामध्ये केंद्र शासनाच्या साहाय्याने पंतप्रधान सूक्ष्म अन्न प्रक्रिया अंतर्गत सामाईक उष्मायन केंद्र, (कॉमन इनक्युबेशन सेंटर) ची उभारणी करण्यात आली आहे. या उष्मायन केंद्रामध्ये गूळ निर्मिती चाचणी प्रात्यक्षिकास गुरुवारी (ता. २२) प्रारंभ करण्यात आला.

चाचणी प्रात्यक्षिकाचे उद्‌घाटन कुलगुरू डॉ. इंद्र मणी, नवी दिल्ली येथील भारतीय कृषी संशोधन संस्थेचे (आयएआरआय) संचालक डॉ. ए. के. सिंग यांच्या हस्ते करण्यात आले. या वेळी शिक्षण संचालक डॉ. उदय खोडके, विभाग प्रमुख डॉ. हिराकांत काळबांडे, अन्नतंत्र महाविद्यालयाचे प्राचार्य डॉ. राजेश क्षीरसागर, डॉ. हेमंत देशपांडे, डॉ. सुरेंद्र सदावर्ते, डॉ. अनुप्रीता जोशी, डॉ. वेदप्रकाश सुर्वे, डॉ. कैलास गाढे, डॉ. प्रवीण घाटगे, डॉ. गिरीश माचेवाड, डॉ. भारत आगरकर, डॉ. भानुदास पाटील, डॉ. भोकरे आदी उपस्थित होते.

या उष्मायन केंद्राअंतर्गत गूळ, गूळ पावडर, गूळ वड्या (क्युब), काकवी निर्मिती, ऊस रसापासून पेय बनविणे, बॉटलिग तसेच मसाले प्रक्रिया उद्योग अंतर्गत हळद पावडर, मिरची पावडर तसेच विविध प्रकारचे मसाले निर्मिती उद्योगांचे प्रात्यक्षिक प्रशिक्षण नव उद्योजक, शेतकरी उत्पादक कंपन्या, महिला स्वयंसहाय्यता गट, प्रक्रिया उद्योजक यांना देण्यात येणार आहे. व्यापारी तत्त्वावर सोयी सुविधा उपलब्ध करुन देण्यात येणार आहेत.

प्रक्रिया उद्योजकांना या केंद्रांतील यंत्र सामग्री भाडे तत्त्वावर वापरण्यास देण्यात येणार आहे. या अंतर्गत आधुनिक गुळप्रक्रिया केंद्र उभारण्यासाठी कृषी विभागाचे संचालक (कृषी प्रक्रिया व नियोजन), पंतप्रधान अन्न प्रक्रिया उद्योग योजनेचे विपणन व्यवस्थापक सत्यवान वऱ्हाडे, राज्य प्रकल्प व्यवस्थापक अमोल चिद्रावर यांचे सहकार्य लाभले. या केंद्रासाठी एकूण ३ कोटी २९ लाख रुपये निधी मंजूर आहे.

त्यात गूळ प्रक्रिया उद्योगासाठी १ कोटी रुपये, ऊसरस पेय निर्मितीसाठी ४५ लाख रुपये, मसाले प्रक्रिया उद्योगासाठी ५५ लाख रुपये, गुणवत्ता नियंत्रण प्रयोगशाळेसाठी २५ लाख रुपये निधीची तरतूद आहे. पायाभूत सुविधांच्या उभारणीसाठी १ कोटी रुपये निधी आहे. गूळ निर्मितीसाठी प्रतिदिन १० टन ऊस गाळप करणारी यंत्रसामग्री बसविण्यात आली आहे.