Jaggery Rate : कोल्हापूर शाहू मार्केट यार्डात दिवाळी पाडव्यादिवशी मुहूर्ताचे गूळ सौदे झाल्यानंतर गुळाला चांगला दर मिळत आहे. परंतु विधानसभा निवडणुकीमुळे गूळ उत्पादनचं कमी झाल्याने आवक कमी झाली आहे. दरम्यान या आठवड्यात गुळाची आवक वाढल्यास शेतकऱ्यांना चांगला भाव मिळण्याची शक्यता आहे. तूर्तास गूळ आवक जेमतेम असल्याने मोजक्या उत्पादकांनाच मार्केटमध्ये लाभ मिळत असल्याचे चित्र आहे.

बाजार समितीचे सचिव जयवंत पाटील म्हणाले की, विधानसभा निवडणुकांमुळे मराठवाड्यातील नेत्यांनी गुळकरी व ऊस तोडणी कामगारांना मतदान करण्यासाठी थांबवले होते. त्यासाठी रसदही पुरवली होती यामुळे कामगार तेथेच थांबून होते. काही ऊस तोडणी कामगार मतदानांतर येत आहे तर काही निवडणूक निकालानंतर कामगारांचे गट येणार आहेत. बाजार समितीत गूळ सौदे सुरू झाले आहेत. परंतु पूर्ण क्षमतेने गुळाचे उत्पादन सुरू झालेले नाही. गुळाची आवक होत आहे; मात्र त्याचे प्रमाण कमी असल्याचे पाटील यांनी सांगितलं.

विधानसभा निवडणुकीमुळे जिल्ह्यातील निम्म्याहून अधिक साखर कारखाने सुरू झालेले नाहीत. गूळ हंगामातील मुहूर्ताचे सौदे होऊन वीस दिवस झाले; मात्र मोजकी गुऱ्हाळघरे सुरू असल्याने गुळाची आवक कमी आहे. परिणामी यंदाच्या गूळ हंगामाचा गोडवा अजूनही वाढलेला नाही. याचबरोबर शेतकऱ्यांना ऊस घालवून रब्बी पेरणीचेही वेध लागले आहेत. यामुळे शेत रिकामे करण्यासाठी कोणत्याही गुऱ्हाळ घराला किंवा साखर कारखान्यांला ऊस देण्याची घाई शेतकरी करण्याची शक्यता आहे.

शाहू मार्केट यार्डातील गूळ बाजारात मुहूर्ताच्या सौद्यासाठी पाच हजार गूळ रव्यांची आवक झाली होती. त्यानंतरच्या आठवड्याभरात किमान ५० हजार ते एक लाख गूळ रव्यांची आवक होणे अपेक्षित होते; मात्र जिल्ह्यातील मोजकी दहा-बारा गुऱ्हाळघरे सुरू झाली आहेत.

बार्शी, सोलापूर, बीड, लातूर भागांतील गुळकरी कामगार गुऱ्हाळघरावर काम करण्यासाठी अवघे दोन हजारांवर कामगार आले. त्यांच्या सोबतीला स्थानिक कामगार घेऊन वीस-पंचवीस गुऱ्हाळघरांवर गूळ उत्पादन सुरू झाले. त्यात करवीर, पन्हाळा, कागल येथील गुऱ्हाळघरांचा समावेश आहे. मात्र, अद्यापही अन्य भागांत गुऱ्हाळघरे सुरू झालेली नाहीत.

गुळाचे भाव असे

प्रथम श्रेणीतील गुळाला ५ हजार ४०० रूपये तर द्वितीय श्रेणीतील गुळाला ४ हजार २०० रूपये दर आहे. तृतीय श्रेणीतील गुळाला ३ हजार ९०० रूपये दर आहे. चतुर्थ श्रेणीतील गुळाला ३ हजार ६०० रूपये दर मिळत आहे. जिल्ह्यात दिवसाला सरासरी बाजार समितीत २४ हजार गुळ रव्यांची आवक होत आहे.