Kolhapur Weather Update : कोल्हापूर, सांगली, साताऱ्यात थंडीचा जोर वाढणार; हवामान विभागाचा अंदाज

Weather Update : कोल्हापूर जिल्ह्यात पुढचे काही दिवस थंडीचा जोर वाढणार आहे. शहरासह ग्रामीण भागात विविध ठिकाणी शेकोटी पेटल्या आहेत. पुढील ५ दिवस थंडीचा जोर राहणार असल्याचे कोल्हापूर वेधशाळेकडून सांगण्यात आले आहे. कोकण, कोल्हापूर भागात रब्बी हंगामातील विविध शेती कामात शेतकरी व्यस्थ झाला आहे.

कोल्हापूर जिल्ह्यातील राधानगरी, शाहूवाडी नाचणी पिकाची वेचणी सुरू आहे तर अंतीम टप्प्यात आलेल्या भात पिकाची काढणी सुरू आहे. शिरोळ, हातकणंगले भागात थंडीचा जोर वाढल्याने गहू पेरणीस पोषक वातावरण झाले आहे. यामुळे शेतकरी गहू पेरणीच्या लगबगीला लागला आहे.

हिमालयासह उत्तर भारतात पश्चिमी विक्षोप सक्रिय आहे. त्यामुळे हिमालयात बर्फवृष्टी सुरू झाली आहे. पंजाब, हरियाणासह दिल्ली परिसरात थंडीत वाढ झाली आहे. उत्तर भारतामध्ये सकाळी दाट धुकेही आहे. उत्तरेकडून महाराष्ट्रामध्ये येणाऱ्या या थंड वाऱ्यांमुळे राज्यासह कोल्हापूर, सांगली, सातारा या भागात किमान तापमानात घट झाली आहे. येत्या २६ नोव्हेंबरनंतर थंडीतील सातत्य जैसे थे राहण्याचा अंदाज आहे. तरी त्या दरम्यान बंगालच्या उपसागरात हवेच्या तीव्र कमी दाब क्षेत्राची शक्यता आहे.

तुरळक ठिकाणी किरकोळ पावसाची शक्यता आहे. त्यामुळे पुणे, जळगाव, कोल्हापूर, नाशिक, सांगली, सोलापूर, मुंबई परभणी, नागपूर या नऊ जिल्ह्यांत चार दिवसांत म्हणजे २७ ते ३० नोव्हेंबर दरम्यान थंडीला काहीसा विराम मिळू शकतो.