Amaravati News : सिंचन सुविधा वाढीसाठी प्रकल्पांची घोषणा केली जाते. मात्र यातून कंत्राटदाराचे हित जपता यावे याकरिता रखडत ठेवला जातो. निम्नपेढी देखील असाच लालफितशाहीत अडकला असून २००८ पासून यावर सुमारे २ हजार कोटी रुपये खर्च करण्यात आले आहेत.

विदर्भात सिंचन सुविधांचा नावावर प्रकल्पांची घोषणा केली जाते. त्यानंतर मात्र हे प्रकल्प वर्षानुवर्षे पूर्ण केले जात नाही. परिणामी प्रकल्पाच्या मुळ किंमतीत मोठी वाढ होते, असाच अनुभव आहे. निम्न पेढी प्रकल्प देखील असाच २००८ मध्ये सुरु करण्यात आला.

या प्रकल्पाच्या माध्यमातून अमरावती जिल्ह्याच्या दर्यापूर तसेच अकोला जिल्ह्यातील मूर्तिजापूर या खारपणपट्टयातील शेतकऱ्यांच्या शेतीला पाणी मिळणार होते. सुमारे १२ हजार २३० हेक्‍टर इतकी सिंचन क्षमता या प्रकल्पातून अपेक्षीत होती. भातकुली तालुक्‍यातील पाच गावांचे भूसंपादन तसेच १९ गावातील २५३५ हेक्‍टर जमीन याकरिता संपादित करण्याचे प्रस्तावीत होते.

२००८ साली सुरु झालेल्या या प्रकल्पाची मुळ किंमत अवघी १६१ कोटी रुपये इतकी होती. मात्र नियोजित वेळेत प्रकल्पाचे काम पूर्णत्वास गेले नाही. त्यामुळे गेल्या १६ ते १७ वर्षात या प्रकल्पाची किंमत २ हजार कोटी रुपयांवर पोहचली आहे. प्रकल्पाबधीत गावातील दोन हजार पेक्षा अधिक कुटुंब बाधित झाली आहेत.

त्यातील बहुतांश भूमिहीन झाली. परंतु अद्यापही १२३० हेक्‍टरवरील सिंचनाचे स्वप्न पूर्णत्वास गेले नाही. प्रत्यक्ष सिंचन केव्हा होईल, कालव्यातून पाणी केव्हा सोडले जाईल, हे अधिकारी देखील सांगू शकत नाहीत. पुनर्वसनाचा प्रश्‍न निकाली न निघाल्याने हे काम रखडल्याच दावा केला जात आहे.

भातकुली मूर्तीजापूरातील क्षेत्र येणार ओलातीखाली...

भातकुली तालुक्‍यातील निंभा येथे प्रस्तावित निम्न पेढी प्रकल्पाच्या माध्यमातून भातकुली तालुक्यातील ३९, मूर्तीजापूर तालुक्‍यातील सहा गावातील १२ हजार २३० हेक्‍टर क्षेत्र सिंचनाखाली येणार आहे.