Padalse Irrigation Project : सुधारित मान्यतेनंतरही पाडळसे प्रकल्पाचे भिजत घोंगडे

Jalgaon News : तापी नदीवरील अमळनेर (जि. जळगाव) नजीकच्या निम्न तापी पाडळसे प्रकल्पास डिसेंबर २०२३ मध्ये सुधारित प्रशासकीय मान्यता शासनाने दिली आहे. यामुळे अनेक वर्षे रखडलेल्या या प्रकल्पास गती मिळेल, असे चित्र होते. पण काम सुरू नसल्याचीच ओरड शेतकरी, ग्रामस्थांत आहे.

१४ वर्षे हा प्रकल्प सुधारित प्रशासकीय मान्यतेच्या प्रतीक्षेत होता. त्याचा खर्च सतत वाढला. जळगाव जिल्ह्यातील अमळनेर, चोपडा, जळगाव, धरणगाव व धुळ्यातील शिरपूर व शिंदखेडा तालुक्यास या प्रकल्पाचा लाभ होणार आहे. शेतीसह उद्योगासंबंधी या भागास या प्रकल्पाचा मोठा लाभ होणार आहे. २८ वर्षे हा प्रकल्प रेंगाळलेला आहे.

या काळात आता चौथ्यांदा या प्रकल्पास सुधारित प्रशासकीय मान्यता मिळाली आहे. चार हजार ८९० कोटी ७७ लाख रुपये निधी खर्चास राज्य शासनाने मंजुरी दिली होती. लवकरच प्रकल्पाचे रखडलेले काम पूर्ण होईल, अशी अपेक्षा होती. राज्य शासनाने या प्रकल्पास प्रशासकीय मान्यता दिल्याने पंतप्रधान सिंचन योजनेत या प्रकल्पाच्या समावेशाचा मार्गही मोकळा झाला.

१९९५-९६ मध्ये प्रथमच या प्रकल्पास मंजुरी देण्यात आली होती. त्या वेळेस सुमारे १४२ कोटी रुपये निधीची घोषणा झाली होती. परंतु निधी न मिळाल्याने पुन्हा त्यासाठी प्रशासकीय मंजुरी देण्यात आली होती. पुन्हा निधीची अडचण आली. यामुळे प्रकल्पाचा खर्च सतत वाढून पाच हजार कोटींपर्यंत पोहोचला आहे.

एक लाख हेक्टर क्षेत्र भिजणार

पाडळसे निम्न तापी प्रकल्पामुळे जळगाव व धुळे जिल्ह्यातील सुमारे एक लाख हेक्टर क्षेत्राला लाभ होणार आहे. केळी, भाजीपाला, फळे व कापूस पिकाच्या शेतीला मोठा आधार या प्रकल्पामुळे होऊ शकतो, असा दावा प्रशासन, शासन करीत आहे.