Sangli News : तालुक्यात म्हैसाळ उपसा सिंचन योजनेच्या कामात अधिकारी व ठेकेदारांकडून मोठा गैरकारभार सुरू आहे. नियोजित अंदाजपत्रकानुसार पाइपलाइनचे काम चार ते पाच फूट जमिनीखालून होणे अपेक्षित असताना ठेकेदारांनी दीड, दोन ते अडीच फुटांच्या चरी खोदून पाइपलाइन पुरण्याचा प्रकार समोर आला आहे.

शिवाय, शेतकऱ्यांनी शेतीसाठी पाइपलाइन नेली आहे. त्याच अंतरावर म्हैसाळ वितरिकेचीही पाइप बुजविण्याचे काम सुरू आहे. त्यामुळे अंदाजपत्रकात दिलेल्या तरतुदींनुसार ठेकेदाराने काम पूर्ण करावे, तसेच झालेल्या कामाची राज्यस्तरीय समिती नेमून सखोल चौकशी करावी, अन्यथा सांगली पाटबंधारे कार्यालयासमोर उपोषण करू, असा इशारा काँग्रेसचे नेते नाथाभाऊ पाटील यांच्यासह शेतकऱ्यांनी दिला.

जत तालुक्यात कुंभारी, बाज, अंकले, बागेवाडी, धावडवाडीसह वंचित भागाला बंदिस्त वितरिकेद्वारे पाणीपुरवठा करण्याचे काम अंतिम टप्यात आहे. तालुक्यात अंदाजे दीड हजार किलोमीटर या कामाचे स्वरूप आहे. यावर शासन कोट्यवधी रुपये खर्च करत आहे. शिवाय, ही योजना पूर्ण होणार, या अपेक्षेने दुष्काळी जनतेच्या दोन ते तीन पिढ्यांनी वाट पाहिली.

मात्र, ‘म्हैसाळ’चे अधिकारी व ठेकेदाकडून चुकीच्या धोरणामुळे भविष्यात या योजनेच्या अस्तित्वाला मोठा धोका निर्माण होऊ शकतो. यासह शेतकऱ्यांना भविष्यात शेतीचा विकास साधणे हा मोठा अडचणीचा प्रश्न निर्माण झाला आहे. त्यामुळे पाइपलाइन पाच फुटांच्या खाली असेल तरच शेतीच्या व योजनेची पाइपलान सुस्थितीत राहणे, प्रशासकीय व शेतकऱ्यांच्या दृष्टीने सोयीचे ठरणार आहे.

राज्य सरकारने चौकशी करावी : पाटील

जत तालुक्यात बंदिस्त वितरिका योजनेच्या कामात कोट्यवधींचा गैरकारभार होत असल्याचे सिद्ध झाले आहे. या प्रकरणाची राज्य सरकारने तातडीने दखल घेऊन स्वतंत्र यंत्रणेमार्फत चौकशी करावी, अशी मागणी शेतकरी नेते नाथाभाऊ पाटील यांनी केली. तसेच पाटबंधारे कार्यालयासमोर शेतकऱ्यांसह उपोषणाचा इशारा दिला.