Parbhani News : उत्पादकतेत वाढ करण्यासाठी येत्या खरीप हंगामात कपाशीची सघन पद्धतीने लागवड करावी लागेल, असे प्रतिपादन विशेष कापूस प्रकल्पातील तांत्रिक प्रशिक्षक डॉ. उषा सातपुते यांनी केले.

भारतीय कृषी संशोधन परिषदेअंतर्गत नागपूर येथील केंद्रीय कापूस संशोधन संस्था व परभणी कृषी विज्ञान केंद्र यांच्यातर्फे कपाशीच्या उत्पादकता वाढीसाठी राबविण्यात येत असलेल्या विशेष कापूस प्रकल्पाअंतर्गत उक्कलगाव (ता. मानवत) येथे आयोजित शेतकरी प्रशिक्षणात त्या बोलत होत्या.

अध्यक्षस्थानी सरपंच उत्तम गायकवाड होते. मंगरूळ येथील प्रगतिशील शेतकरी अशोक देशमाने, दिनेश चांडक, प्रकल्प समन्वयक अमित तुपे आदी उपस्थित होते. देशमाने म्हणाले, की योग्य अंतर ठेवून कपाशीची लागवड करावी.

शेंडा खुडून झाडांची उंची पारंपरिक पद्धतीपेक्षा कमी ठेवावी. गळ फांद्या काढून टाकाव्यात. त्यामुळे फळ फांदीला योग्य प्रकारे अन्नद्रव्य मिळते. बोंडांचा आकार वाढतो. उत्पादनात वाढ होते.

दादा लाड तंत्रज्ञानाने कापसाच्या उत्पादनामध्ये वाढ झाली असे त्यांनी सांगितले. उक्कलगाव, इटाळी, केकरजवळा, मंगरुळ या गावातील शेतकरी उपस्थित होते.