Jalna News : शेतकऱ्यांनी उडीद पिकाखालील क्षेत्र वाढवावे असे आवाहन खरपुडी येथील कृषी विज्ञान केंद्राचे वरिष्ठ शास्त्रज्ञ व प्रमुख श्रीकृष्ण सोनुने यांनी केले. वखारी (ता. जालना) गुरुवारी (ता. १२) येथे आयोजित उडीद शेती दिन कार्यक्रमात बोलत होते. या प्रसंगी सर्व उपस्थित शेतकऱ्यांनी निवृत्ती घुले यांच्या उडीद पीक प्रात्यक्षिक प्लॉटला भेट देऊन पाहणी केली.

डॉ. सोनुने म्हणाले, की कृषी विज्ञान केंद्राद्वारे राष्ट्रीय अन्न सुरक्षा अभियानांतर्गत या वर्षीच्या खरीप हंगामात एकूण ५० हेक्टर क्षेत्रावर १२५ शेतकऱ्यांच्या शेतावर पीडीकेव्ही ब्लॅक गोल्ड या वाणाची प्रथमदर्शी पीक प्रात्याक्षिके घेण्यात आली आहेत. भारत अन्नधान्याच्या बाबतीत स्वयंपूर्ण झाला असला तरी अजूनही आपणास डाळी व खाद्यतेल बाहेरील देशातून आयात करावी लागतात.

त्यात उडीद व तूर या पिकांचा मोठ्या प्रमाणात तुटवडा असल्यामुळे या पिकांची उत्पादकता वाढविण्यावर केंद्र सरकारचा भर आहे. उडीद हे कडधान्य पीक असल्यामुळे जमिनीची सुपीकता वाढविण्यास मदत करते, तसेच प्रथिनांचे प्रमाण जास्त असल्यामुळे मानवी आरोग्यासाठी उपयुक्त आहे.

उडीद पिकाची उत्पादनक्षमता चांगली असून, सध्या बाजारभावही चांगले आहेत. त्यामुळे शेतकऱ्यांनी सर्व शिफारशींचा अवलंब करून उडीद पिकाखालील क्षेत्र उत्पादन वाढवावे, असेही ते म्हणाले.

या प्रसंगी कृषी विज्ञान केंद्राचे शास्त्रज्ञ राहुल चौधरी, कुसळी येथील प्रगतिशील शेतकरी विठ्ठल वैद्य, निवृत्ती घुले, रामप्रसाद खैरे यांचेसह इतर मान्यवरांची उपस्थिती होती. कार्यक्रमाचे औचित्य साधून शेतकऱ्यांना पुनरुत्पादन शेती, शून्य मशागत तंत्रज्ञान, कापूस उत्पादन तंत्रज्ञान या विषयांवर उपस्थित मान्यवरांनी मार्गदर्शन केले. कार्यक्रमाचे सूत्रसंचालन वखारी येथील रामप्रसाद खैरे यांनी केले तर आभार निवृत्ती घुले यांनी मानले. कार्यक्रमास सुमारे ५० गावांतून शेतकऱ्यांची उपस्थिती होती.