Nagpur News : निवडणुकीच्या पार्श्‍वभूमीवर भाजपने मोदींची गॅरंटी म्हणून छत्तीसगडमध्ये धानाची हमीभावापेक्षा ४० टक्‍के अधिक दराने खरेदीचे आश्‍वासन दिले आहे. त्याच धर्तीवर महाराष्ट्रात देखील भाजपप्रणीत राज्य सरकारने ही अभिनव संकल्पना प्रत्यक्षात आणत सोयाबीन, कापूस उत्पादकांना ४० टक्‍के वाढीव दर द्यावा, अशी मागणी शेती विषयाचे अभ्यासक विजय जावंधिया यांनी केली.

उपमुख्यमंत्री देवेंद्र फडणवीस यांच्याकडे पत्राव्दारे त्यांनी ही मागणी केली आहे. त्यानुसार, छत्तीसगड राज्यात धान उत्पादकांची संख्या अधिक आहे. यंदा केंद्र सरकारने धानाला २१८३ रुपयांचा हमीभाव जाहीर केला आहे. छत्तीसगडमध्ये भाजप सरकार आल्यास त्यांना अतिरिक्‍त ४० टक्‍के बोनस देण्यात येईल.

त्यामुळे धानाचा भाव ३१०० रुपये प्रतिक्‍विंटलवर जाईल. पंतप्रधान मोदी यांनी शेतकऱ्यांचे उत्पन्न दुप्पट करण्याची घोषणा केली आहे. त्या पार्श्‍वभूमीवर महाराष्ट्रात देखील या योजनेची अंमलबजावणी होत सोयाबीन, कापूस उत्पादकांना ४० टक्‍के अतिरिक्‍त दर मिळावा, अशी मागणी आहे.

यंदा सोयाबीन, कपाशीची उत्पादकता विपरीत वातावरणामुळे प्रभावित झाली आहे. उत्पादकता खर्चाची भरपाई होणार नाही, अशी स्थिती आहे. कापूस, सोयाबीनला बोनसची योजना महाराष्ट्रात राबविल्यास ७०२० रुपयांचा कापसाचा हमीभाव असल्यास तो दर ९८०० तर सोयाबीन ४६०० रुपयांवरून ६५०० रुपयांवर जाईल.

पंतप्रधान मोदी यांचे ‘वन नेशन वन मार्केट’चे स्वप्न आहे, या योजनेच्या माध्यमातून ते प्रत्यक्षात येणार आहे. परिणामी या योजनेची अंमलबजावणी महाराष्ट्रात व्हावी, अशी मागणी श्री. जावंधिया यांनी केली.