Pune News : केंद्र सरकारने इफको कंपनीच्या द्रवरूप स्वरुपातील १६ टक्के नत्राचे प्रमाण असलेल्या नॅनो युरिया नव्या श्रेणीस मान्यता दिली आहे. केंद्र सरकारने काढलेल्या आदेशानुसार तीन वर्षाकरिता ही मान्यता असेल.

इंडियन फार्मर्स फर्टिलायझर को- ऑपरेटिव्ह लिमिटेड (इफको) या संस्थेने नॅनो तंत्रज्ञानाचा वापर करून सर्वप्रथम नॅनो युरियाची २०२१ मध्ये निर्मिती केली. यावेळी नॅनो युरियामध्ये नत्राचे प्रमाण ४ टक्के होते.

नव्या श्रेणीत नॅनो युरियामध्ये नत्राचे प्रमाण आता १६ टक्क्यांवर नेण्यात आले आहे. केंद्राने त्यावर शिक्कामोर्तब केल्यामुळे शेतकऱ्यांना हे नवे उत्पादन लवकरच बाजारात उपलब्ध होईल.

नॅनो युरियामधील १६ टक्के नत्राबाबत मंगळवारी (दि.१६) केंद्र सरकारने शासकीय राजपत्र प्रसिद्ध करून खत नियंत्रण आदेशामध्ये या खताचा समावेश केला आहे. आगामी खरीप हंगामापासून शेतकऱ्यांना ते उपलब्ध करून देण्यात येणार आहे.

नव्या श्रेणीच्या नॅनो युरियामध्ये फिजिकल २० ते ५० एनएम आणि हायड्रोडायनॅमिक २० ते ८० एनएम (किमान ५० टक्के घटकांचा आवश्‍यक आकार) आकाराचे अत्यंत सूक्ष्म नत्र कणांचे द्रावण असते.

ज्यांची कार्यक्षमता ९० टक्के आहे. तर, सामू ४ ते ८.५ असणार आहे. नॅनो युरिया हाताळणीला सोपे, किफायतशीर आणि पिकांच्या उत्पन्नात आणि गुणवत्तेमध्ये भरीव वाढ करत असल्याचा दावा ‘इफको’चे महाराष्ट्राचे विभागीय व्यवस्थापक उदय तिजारे यांनी पत्रकात केला आहे.