Nanded News : जिल्ह्यातील शेतकऱ्यांची केळी क्लस्टरची मागणी होती. या अनुषंगाने खासदार रवींद्र चव्हाण यांनी बुधवारी (ता. ३०) केंद्रीय कृषिमंत्री शिवराजसिंह चव्हाण यांची भेट घेऊन नांदेड जिल्ह्यामध्ये केळीचे क्लस्टर सुरू करण्याबाबत सकारात्मक चर्चा केली. त्यामुळे जळगावच्या धर्तीवर नांदेडमध्ये केळीचे क्लस्टर लवकरच मंजुरीच्या आशा पल्लवीत झाली आहे.

राज्यात ६० हजार हेक्टरवर असलेल्या केळी लागवडीपैकी नांदेड जिल्ह्यात १५ हजार हेक्टरचा समावेश आहे. जिल्ह्यातील दर्जेदार ’अर्धापुरी’ केळी जगभर प्रसिद्ध आहे. मुदखेड, अर्धापूर, नांदेड, भोकर व हदगाव तसेच हिंगोली जिल्ह्यांतील वसमत व कळमनुरी तालुक्यात केळीची लागवड केली जाते. येथील केळीची निर्यात आखाती देशात होते.

यासोबतच हैदराबाद, कोलकाता, चंदीगड, दिल्ली, काश्मीर, पाकिस्तान, अफगाणिस्तान येथेही ‘अर्धापुरी’ केळी पाठवली जाते. परंतु मागच्या ३५ वर्षांपासून येथील केळी उत्पादक शेतकऱ्यांना कुठल्याच प्रकारच्या सुविधा उपलब्ध नसल्याने शेतकऱ्यांचे दरवर्षी होणारे मोठे आर्थिक नुकसान होते. याबाबत खासदार रवींद्र चव्हाण यांनी केंद्रीय कृषी मंत्री शिवराजसिंह चौहान यांच्या निदर्शनास आणून दिले.

जिल्ह्यातील केळी उत्पादक शेतकऱ्यांना विविध आर्थिक आणि पायाभूत सोईसुविधा मिळवून देण्यासाठी ‘राष्ट्रीय फलोत्पादन मंडळाच्या फलोत्पादन क्लस्टर विकास कार्यक्रमांतर्गत’ नांदेड जिल्ह्यात ‘केळी क्लस्टर’ला मंजुरी देण्यात यावी अशी मागणी त्यांनी केंद्र सरकारकडे केली आहे. क्लस्टर स्थापनेमुळे केळीच्या उत्पादन, साठवणूक आणि विपणन क्षेत्रात गुंतवणूक वाढणार आहे.

त्यातून उच्च व दर्जेदार केळीची निर्यात होणार आहे. यासोबत प्रक्रिया उद्योगाला चालना मिळणार असून केळीसाठी भौतिक सोयीसुविधा, शीतगृहे, व्यापारसंकुल आणि देश विदेशातील केळी व्यापाऱ्यांचे जाळे निर्माण होणार आहे. यातून रोजगार वाढीसोबतच केळी उत्पादक शेतकऱ्यांच्या जीवनात आर्थिक भरभराट येणार असल्याचे मत खासदार रवींद्र चव्हाण यांनी व्यक्त केले.