Wardha News : अभियांत्रिकीतील प्रवेशित शेतकरी पाल्यांना अनुदानावर लॅपटॉप वितरणाचा महत्त्वाकांक्षी उपक्रम हिंगणघाट बाजार समितीकडून राबविला जात आहे. कोरोनकाळात या योजनेच्या अंमलबजावणीला खीळ बसल्यानंतर या वर्षी पुन्हा विद्यार्थ्यांकडून प्रस्ताव मागविण्यात आले आहेत.

हिंगणघाट बाजार समितीच्या वतीने शेतकरी हिताच्या योजना राबविण्यावर भर देण्यात आला आहे. शेतकरी पाल्यांना उच्चशिक्षण मिळावे, याकरिता देखील समिती प्रयत्न करते. त्यानुसार २०११-१२ या वर्षापासून लॅपटॉप वितरणाची योजना सुरू करण्यात आली.

कोरोना आणि बाजार समिती निवडणूक प्रक्रियेमुळे तीन वर्ष ही योजना कार्यान्वित करता आली नाही; परंतु शेतकरी आणि त्यांच्या पाल्यांकडून मागणी झाल्याने यंदापासून पुन्हा ही योजना कार्यान्वित करण्यावर भर देण्यात आला आहे.

हिंगणघाट व समुद्रपूर तालुक्‍यांतील शेतकरी व शेतमजुरांना याचा लाभ घेता येईल. अभियांत्रिकीच्या द्वितीय वर्षाला संबंधित विद्यार्थी प्रवेशित असावा, असा निकष आहे.

पालकाचा शेतीशिवाय दुसरा कोणताही व्यवसाय नसावा, अर्जासोबत गुणपत्रिका आणि द्वितीय वर्षात प्रवेश घेतल्याची पावती जोडावी, बोनाफाइड प्रमाणपत्र, सातबारा, निव्वळ शेती व्यवसाय असल्याबाबतचे तलाठी प्रमाणपत्र तसेच शंभर रुपयांच्या मुद्रांक शुल्कावर शपथपत्र, असे दस्तऐवज प्रस्तावासोबत जोडावे लागतात.

आलेल्या प्रस्तावाची खातरजमा वर्धा येथील एका अभियांत्रिकी महाविद्यालयाच्या माध्यमातून केली जाते. त्यानंतर संबंधितांना योजनेच्या लाभासाठी पात्र ठरविण्यात येते. पात्र लाभार्थ्यांना लॅपटॉप किमतीच्या ५० टक्‍के रक्‍कम जमा करावी लागते.