Sangli News : शिराळा तालुक्यात पावसाने उघडीप दिली होती. मात्र दोन दिवसांपासून पुन्हा पाऊस सुरू झाला आहे. वारणा धरण पाणलोट क्षेत्रात पुन्हा पावसाचा जोर वाढला आहे. त्यामुळे शनिवारी (ता. २६) धरणातून पाण्याचा विसर्ग ३२२० क्युसेकने वाढवून तो १० हजार २६० क्युसेक इतका केला आहे.

त्यामुळे वारणा नदीकाठच्या गावांना सतर्कतेचा इशारा दिला आहे. जिल्ह्यात गेल्या चोवीस तासात १३ मिलिमीटर इतक्या पावसाची नोंद झाली आहे. जिल्ह्यात गेल्या काही दिवसांपासून पावसाने उसंत घेतली आहे. गेल्या दोन दिवसांपासून हलका पावसाने हजेरी लावली.

शुक्रवारी (ता. २५) रात्रीपासून पावसाचा सुरुवात झाली असून शनिवारी (ता. २६) सकाळपर्यंत पाऊस सुरू होता. जिल्ह्यात गेल्या चोवीस तासांत १३ मिलिमीटर इतका पाऊस झाला आहे. शिराळा तालुक्यात सर्वाधिक पाऊस झाला आहे. दुपारनंतर ढगाळ वातावरण होते. शिराळा तालुक्यासह धरण पाणलोट क्षेत्रात पावसाचा जोर आहे.

दरम्यान, शिराळा तालुक्यातील वारणा धरण पाणलोट क्षेत्रात गेल्या तीन ते चार दिवसापूर्वी पावसाने पूर्ण उघडीप दिली होती. गेल्या दोन दिवसांपासून धरण पाणलोट क्षेत्रात पावसाचा पुन्हा जोर वाढला आहे. धरण पाणलोट क्षेत्रात गेल्या चोवीस तासांत ३८ मिलिमीटर इतका पाऊस झाला आहे. आजअखेर १८४७ मिलिमीटर इतक्या पावसाची नोंद झाली आहे.

शुक्रवारी (ता. २५) धरणातून वक्रद्वारातून ५४१४ क्युसेक व विद्युतगृहातून १३६० क्युसेक असा एकूण ७०७० क्युसेकने विसर्ग सुरु होता. दोन दिवसांत पावसाचा जोर वाढल्याने धरणातून पाण्याचा विसर्ग वाढवण्याचा निर्णय धरण व्यवस्थापनाने घेतला. त्यानुसार शनिवारी (ता. २६) धरणातून वक्रद्वारातून ८६३० क्युसेक व विद्युतगृहातून १३६० क्युसेक असा एकूण १०२६० क्युसेकने विसर्ग सुरू आहे.