Jalgaon News : खानदेशात गुरुवारी (ता. २६) अनेक भागात दमदार पाऊस झाला. काही भागात मध्यम ते हलका पाऊस झाला. जळगाव जिल्ह्यातील गिरणा काठच्या भागात बऱ्यापैकी सरी कोसळल्याने पेरण्यांना आधार मिळाला आहे.

जळगाव जिल्ह्यातील धरणगाव, पाचोरा, चाळीसगाव, भडगाव, भुसावळ भागात चांगला पाऊस झाला. काही भागात गुरुवारी दिवसभर व रात्रीदेखील भिज पाऊस सुरू होता. चोपडा, जळगाव, पारोळा, अमळनेर भागात मध्यम ते भिज पाऊस झाला. गुरुवारी रात्रीही काही भागात हलका पाऊस कोसळत होता.

यामुळे संबंधित भागात या आठवड्यात झालेल्या पेरण्यांना लाभ होणार आहे. जळगाव जिल्ह्यात बुधवारी (ता.२५) रात्रीपासून ते गुरुवारी सकाळी ८ पर्यंत सुमारे नऊ मिलिमीटर पाऊस झाल्याची नोंद आहे. परंतु गुरुवारी सकाळी ९ नंतर अनेक भागात जोरदार पाऊस झाला.

जळगाव जिल्ह्यातील पारोळा तालुक्यातील तामसवाडी मंडळात ६० मिलिमीटर पाऊस झाला. चाळीसगाव तालुक्यात बहाळ मंडळात ४८, तळेगावात ३९ आणि हातले मंडळात दुपारपर्यंत ३८ मिलिमीटर पाऊस झाला. धरणगाव तालुक्यातील सोनवद मंडळात ६५ मिलिमीटर पाऊस गुरुवारी झाला.

मुक्ताईनगर, बोदवड व जामनेर भागात पावसाचा जोर कमी होता. मुक्ताईनगरात सुमारे ११ मिलिमीटर पाऊस झाला. पाचोरा तालुक्यात २८ मिलिमीटर पाऊस झाला. जळगाव, धरणगाव, चोपडा भागात दिवसभर पावसाची रिपरिप सुरू होती.

धुळे व नंदुरबारातही काही भागात चांगला तर काही भागात भिज पाऊस झाला. काही भागात शेतातून पाणी वाहून निघाले नाही, अशी स्थिती होती. यामुळे एकूण पावसाची टक्केवारी वाढली आहे.