Sindhudurg News : जिल्ह्यात पावसाचा जोर पुन्हा वाढला असून (ता. १३) सकाळपासून जिल्ह्याच्या सर्व भागात जोरदार सरी पडत आहेत. त्यामुळे पडझडीच्या प्रकारात देखील वाढ झाली आहे. दरम्यान, हवामान विभागाने पुढील तीन दिवस आँरेज अलर्ट जाहीर केला आहे.

७ जुलैला जिल्ह्यात अतिवृष्टी झाल्यामुळे पूरस्थिती निर्माण झाली होती. त्यानंतर जिल्ह्याच्या किनारपट्टी भागात पावसाचा जोर अधिक राहिला. परंतु उर्वरित जिल्ह्यात मात्र पावसाचे प्रमाण संमिश्र राहिले. गेले दोन दिवस पावसाने उघडीप दिली होती. परंतु काल सायंकाळनंतर पावसाचा जोर हळूहळू वाढू लागला.

जिल्ह्यातील वैभववाडी, कणकवली तालुक्यांत काल सायंकाळी उशिरा जोरदार सरी कोसळल्या होत्या. त्यानंतर रात्रभर जिल्ह्यात हलक्या ते मध्यम स्वरूपाच्या सरी पडत होत्या. काही भागांत मुसळधार पाऊस देखील पडत आहे. त्यामुळे पुन्हा एकदा पडझडीचे प्रकार सुरू झाले आहेत. कणकवली तालुक्यातील कळसुली येथील विनायक दळवी यांचे घर मुसळधार पावसामुळे कोसळले.

जिल्ह्यातील सावंतवाडी, मालवण, वेंगुर्ला, वैभववाडी, कुडाळ तालुक्यांत जोरदार पाऊस पडत आहे. पावसाचा जोर कायम राहिल्यास नद्यांच्या पाणीपातळीत अधिक वाढ होण्याची शक्यता आहे. जिल्ह्याच्या काही भागात पावसाने दोन- तीन दिवस उघडीप दिल्यामुळे भातरोपे पुनर्लागवड रखडली होती. परंतु काल सायंकाळपासून जिल्ह्यात दमदार पावसाला सुरुवात झाल्यामुळे भातरोप पुनर्लागवडीला देखील गती प्राप्त झाली आहे.

पुढील चार दिवस आँरेज अलर्ट

जिल्ह्यात पावसाचा जोर वाढला असताना हवामान विभागाने पुढील चार दिवस जिल्ह्यात आँरेज अलर्ट जाहीर केला आहे. या कालावधीत जिल्ह्याच्या अनेक भागांत मुसळधार ते अतिमुसळधार पाऊस पडण्याची शक्यता असून समुद्रात प्रतिताशी ४५ ते ५५ किमी वेगाने वारे वाहणार आहेत. या कालावधीत समुद्रात कुणीही जाऊ नये, असे आवाहन प्रशासनाकडून करण्यात आले आहे.