Satara Rain Update : कोयना धरण क्षेत्रात पावसाचा जोर कायम आहे. धरणात २४ तासांत १.३८ टीएमसीने वाढ झाली आहे. मंगळवारी (ता. १८) सकाळी आठपर्यंत २५.९० टक्के धरणात पाणीसाठा झाला आहे. जिल्ह्याच्या पश्चिम भागात पावसाची मध्यम स्वरूपाचा पाऊस सुरू आहे.

जिल्ह्याच्या पूर्वकडील महाबळेश्वर, जावळी, पाटण, वाई तालुक्यांत हलका ते मध्यम स्वरूपाचा पाऊस झाला आहे. कऱ्हाड, कोरेगाव, माण, खटाव, फलटण, खंडाळा तालुक्यांत तुरळक पाऊस सुरू आहे. जिल्ह्यात २४ तासांत सरासरी १२.८ मिलीमीटर पावसाची नोंद झाली आहे.

दमदार पाऊस येत नसल्यामुळे पेरणीची कामे संथगतीने सुरू आहेत. पश्चिमेकडील पाटण, जावळी, सातारा काही प्रमाणात भातलागणीची कामे सुरू आहेत. ऐन जुलैमध्ये कृषिपंपाद्वारे पाणी देण्याची कामे सुरू आहेत.

कोयना धरण क्षेत्रात सलग दुसऱ्या दिवशी पावसाचा जोर वाढला आहे. धरण क्षेत्रातील कोयना ७७, नवजा ९८ व महाबळेश्वर १५० मिलीमीटर पाऊस झाला आहे. धरणात प्रति सेकंद १६०१८ क्युसेक पाण्याची आवक होत असून धरणात २४ तासांत १.३८ टीएमसीने वाढ झाली आहे. धरणात सकाळी आठपर्यंत २७.२७ टीएमसी म्हणजेच २५.९० टक्के धरण भरले आहे.