Shrinagar News : जम्मू-काश्मीर विधानसभेच्या अधिवेशनात आज दुसऱ्या दिवशी सत्ताधारी आमदार आणि विरोधी पक्षाच्या आमदारांमध्ये कलम ३७० बाबतच्या ठरावावरून बाचाबाची झाली. अखेर विधानसभा अध्यक्षांनी मार्शलना बोलावून गोंधळ घालणाऱ्या आमदारांना सभागृहाबाहेर काढण्यात आले.

सभागृहाचे कामकाज गुरुवारी (ता. ७) सुरू झाल्यानंतर लेंगेट येथील आमदार खुर्शिद अहमद शेख यांनी अध्यक्षांसमोरील हौद्यामध्ये उतरून कलम ३७० आणि ३५अ पुन्हा लागू करू आणि राजकीय कैद्यांची सुटका करू, अशा आशयाचा फलक झळकावला. त्यावरून भाजपचे विरोधी पक्षनेते सुनील शर्मा यांच्यासह भाजपच्या आमदारांनी आक्षेप नोंदविला.

तसेच काही आमदारांनी हौद्यात उतरून शेख यांच्या हातातील फलक हिसकावून घेण्याचा प्रयत्न केला. या वेळी शेख यांच्या मदतीला नॅशनल कॉन्फरन्सचे आमदार आणि सज्जाद लोन आणि वहीद पारा हे आले.

या आमदारांमध्ये बाचाबाची झाल्याने अखेर मार्शलना पाचारण करण्यात आले आणि भाजपच्या आर. एस. पठानिया यांच्यासह काही आमदारांना सभागृहाबाहेर नेले. यावेळी बाचाबाचीत तीन आमदार किरकोळ जखमी झाले. यानंतरही भाजपच्या आमदारांनी जोरदार घोषणाबाजी सुरूच ठेवली.

३७० कलम लागू करण्याबाबत फलक झळकावणारे आमदार खुर्शिद अहमद शेख हे रशीद इंजिनीअर यांचे भाऊ आहेत. रशीद यांना टेरर फंडिग प्रकरणी अटक करण्यात आली असून सध्या त्यांना तिहार तुरुंगात ठेवण्यात आले आहे.