Pune News: राज्यात खरिपाचा पेरा निम्म्याहून अधिक अद्याप झालेला नाही. मात्र पावसाने उघडीप दिल्यामुळे येत्या पंधरवड्यापूर्वी उर्वरित पेरा पूर्ण होऊ शकतो, असा दावा कृषी विभागाच्या सूत्रांनी केला आहे.

राज्यात खरिपाचे सरासरी क्षेत्र १४४ लाख हेक्टर आहे. बुधवारअखेर (ता. २५) यातील केवळ ५६.५४ लाख हेक्टरवरील पेरा पूर्ण झालेला होता. हा पेरा सरासरी क्षेत्राच्या फक्त ३९ टक्के आहे. गेल्या वर्षी याच कालावधीत पेरा ६१.६८ लाख हेक्टरपर्यंत झालेला होता. म्हणजेच गेल्या वर्षीच्या तुलनेत पेरा पिछाडीवर आहे. यंदा एकूण खरीप पेरा १५६ लाख हेक्टरच्या पुढे नेण्याचे उद्दिष्ट कृषी विभागाने ठेवले आहे. त्यामुळे उद्दिष्टाच्या तुलनेत अजून १०० लाख हेक्टरहून अधिक क्षेत्रात पेरा झालेला नाही.

कृषी विभागाच्या म्हणण्यानुसार, पावसाची उघडीप पाहून बहुतेक जिल्ह्यांमध्ये शेतकऱ्यांकडून पेरण्या वेगाने केल्या जात आहेत. पुन्हा अतिपाऊस न झाल्यास येत्या १०-१२ दिवसांत सर्व पेरा आटोपण्याची शक्यता आहे. पेरण्या न झाल्यामुळे राज्यातील कडधान्य पेऱ्याचे वेळापत्रक मात्र विस्कळीत झाले आहे. त्यामुळे कडधान्य उत्पादक शेतकरी चिंतेत आहेत. विशेषतः मुगाचा ६० टक्के पेरा रखडला आहे.

उडदाच्या देखील निम्म्या पेरण्या झालेल्या नाहीत. तूर वगळता कडधान्य पिकाच्या पेरण्या उशिरा झाल्यास उत्पादनात मोठी घट येते. अतिपावसामुळे यंदा नेमक्या कोणत्या पिकाच्या उत्पादनाला फटका बसू शकतो, याचा अंदाज अजूनही कृषी विभागाला आलेला नाही. परंतु, तूर, मका, ऊस, सोयाबीन, भुईमूग अशा नगदी पिकांचा पेरा वाढण्यास स्थिती अनुकूल असल्याचा दावा कृषी विभागातील अधिकारी करीत आहेत.

दरम्यान, राज्यातील सोयाबीन उत्पादक पट्ट्यात काही ठिकाणी पेरा घटू शकतो, असे कृषिशास्त्रज्ञांना वाटते. खुल्या बाजारात सोयाबीनला प्रतिक्विंटल भाव केवळ चार हजार रुपयांच्या आसपास आहेत. त्यामुळे सोयाबीनचे क्षेत्र कमी करून काही भागात मका लागवडीला प्राधान्य दिले जात आहे, असे निरीक्षण शास्त्रज्ञांनी नोंदविले आहे.