Pen News : येत्‍या काही दिवसांत काजूचा हंगाम सुरू होत असल्‍याने आदिवासी महिलांना यातून मोठ्या प्रमाणावर रोजगार मिळतो. पेण तालुक्यातील डोंगराळ भागात राहणाऱ्या अनेक आदिवासी महिला आपल्या उदरनिर्वाहासाठी शहरातील बाजारपेठेत ओल्या काजूगरांची विक्री करत असल्याने यातून त्‍यांना दिवसाकाठी आठशे ते हजार रुपयांची कमाई होत असते.

कोकणातील आंबा, काजू, फणस याबरोबरच ओल्या काजूगरांना मोठी मागणी असते. साधारणपणे उन्हाळ्यात काजूगर बाजारात विक्रीसाठी येत असतात. हा रानमेवा शुद्ध पौष्टिक, बलवर्धक व शरीराला आरोग्यदायी असल्याने त्‍याची दिवसेंदिवस बाजारात मागणी वाढत आहे. मागील काही दिवसांपासून काजूगरांच्‍या बियांच्या हंगामाला सुरुवात झाली आहे. त्‍यामुळे आदिवासी महिला डोंगराळ भागातून ओल्या काजूगर बिया गोळा करत विक्रीसाठी आणतात.

शहराच्या मुख्य बाजारपेठेमध्ये बसून आदिवासी महिला काजूगराच्‍या बिया धारदार विळ्याने कापून त्यातील अर्धे अर्धे गोळे बाजूला करत हिरव्या पानावर त्यातील किमान २० ते २५ बिया मांडून विक्रीसाठी अशाप्रकारे वाटा ठेवण्यात येतो. यातील तीन ते चार वाटे १०० रुपयांना विक्री केले जातात. त्‍यामुळे दिवसाकाठी एक महिला या ओल्या काजूगरांच्या विक्रीतून सुमारे ८०० ते १००० रुपयांची कमाई करते. त्यामुळे येत्या तीन ते चार महिन्यांत त्यांना रोजगार उपलब्ध होतो.