अॅग्रोवन वृत्तसेवा

Jalgaon News : खानदेशात भुईमुगाची पेरणी जानेवारीपर्यंत झाली. पीक जोमात असून, यंदा क्षेत्र अडीच हजार हेक्टरवर स्थिर आहे. सर्वाधिक पेरणी चोपडा (जि. जळगाव) तालुक्यात झाली आहे.

भुईमुगासाठी खानदेशातील सातपुडा पर्वतालगतचा भाग प्रसिद्ध आहे. जळगाव जिल्ह्यात चोपडा, यावल, धुळ्यातील शिरपूर, नंदुरबारमधील तळोदा, शहादा, नवापूर व अक्कलकुवा या भागात भुईमुगाची पेरणी अधिकची केली जाते. खानदेशात मध्यंतरी भुईमुगाची पेरणी घटली होती. ही पेरणी फक्त ४०० ते ४५० हेक्टरवर मर्यादित होती. कारण पाऊसमान तीन वर्षांपूर्वी कमी होते. तसेच दरांबाबतही समाधानकारक स्थिती नव्हती. परंतु चांगला पाऊस व कोविडनंतर दरातील स्थैर्य यामुळे शेतकरी भुईमुगाची पेरणी किंवा लागवड करू लागले. यंदा चांगल्या पावसामुळे लागवड वाढेल, असे सांगण्यात येत होते. अर्थात पेरणी वाढली आहे.

अलीकडे जळगाव जिल्ह्यात जामनेर, पाचोरा भागातही पेरणी होऊ लागली आहे. मागील दोन वर्षे तेलबियावर्गीय पिकांचे दर स्थिर आहेत. यात भुईमुगासही पाच हजार रुपये प्रति क्विंटलचा सरासरी दर मिळाला आहे. तसेच एकरी सात ते आठ क्विंटल शेंगांचे (वाळविलेल्या) उत्पादन अनेकांनी घेतले आहे.

काही शेतकऱ्यांनी विक्री १० ते १२ क्विंटल उत्पादनदेखील घेतले. मका, गहू आदी पिकांच्या तुलनेत भुईमूग परवडल्याने शेतकरी या पिकास पसंती देत आहेत. मागील दोन वर्षे क्षेत्र सातत्याने वाढले.

जानेवारीत अधिक पेरणी

खानदेशात भुईमुगाची पेरणी जानेवारीत अधिक झाली असून, अनेक शेतकरी ठिबक व तुषार सिंचनाच्या मदतीने सिंचन करीत आहेत. यामुळे पाणी कमी लागत असून, पीकस्थिती सध्या बरी आहे. मागील महिन्यातही काही शेतकऱ्यांनी आगाप पेरणी केली आहे. लागवडीसाठी मध्यम, पाण्याचा निचरा होणाऱ्या जमिनीची निवड शेतकऱ्यांनी केली आहे. पीक जोमात आहे. शेंगा लागल्या असून, त्या पक्व होत आहेत.