Gokul Dudh Sangh Kolhapur : कोल्हापूर जिल्हा सहकारी दूध उत्पादक संघातर्फे (गोकुळ) म्हैस व गाय अंतिम दूध दर फरकापोटी ११३ कोटी ६६ लाख रुपये प्राथमिक दूध संस्थांच्या बँक खात्यावर जमा होणार आहेत. दूध उत्पादकांना निव्वळ प्रतिलिटर म्हैस दुधाला २ रुपये २५ पैसे व गाय दुधाला प्रतिलिटर १ रुपया २५ पैसे अंतिम दूधदर फरक देण्यात आला आहे. दूध उत्पादकांसाठी ही दिवाळी भेट असल्याचे 'गोकुळ'चे अध्यक्ष अरुण डोंगळे यांनी प्रसिद्धीपत्रकाद्वारे मंगळवार (ता.०८) माहिती दिली सांगितले.

डोंगळे म्हणाले की, 'गोकुळ' तर्फे दूध उत्पादकांनी प्राथमिक दूध संस्थेमार्फत पुरवठा केलेल्या दुधास संघामार्फत अंतिम दूध दर फरक आर्थिक वर्षांच्या शेवटी निश्चित केला जातो. तो पुढील सणासुदीच्यावेळी दिला जातो. गतवर्षपेक्षा दूध उत्पादकांना यावर्षी १२ कोटी ३२ लाख रुपये जादा फरक मिळणार आहे. संस्थांच्या बँकेतील खात्यावर शुक्रवारी (ता. ११) हा फरक जमा होणार आहे.

डोंगळे पुढे म्हणाले की, यावर्षी संघाने म्हैस दुधाकरिता ५८ कोटी ६१ लाख ५८ हजार रुपये, तर गाय दुधाकरिता ३४ कोटी ७० लाख ९३ हजार रुपये इतका दूधदर फरक जाहीर केला आहे. दर फरकावर ६ टक्के प्रमाणे होणारे व्याज ३ कोटी २० लाख ३५ हजार व डिंबेचर व्याज ७.७० टक्के प्रमाणे ८ कोटी ९६ लाख ६६ हजार रुपये आहे.

शेअर्स भांडवलावरती ११ टक्के प्रमाणे लाभांश आठ कोटी १६ लाख ८९ हजार रुपये असे एकूण ११३ कोटी ६६ लाख रुपयांची रक्कम स्वतंत्र दूध बिलातून दूध संस्थांच्या खात्यावर बँकेत जमा केली जाईल. दर फरकाचा लाभ जिल्ह्यातील तसेच सीमाभागातील सात हजार ९२७ दूध संस्थांच्या साडेपाच लाख दूध उत्पादकांना होईल अशी माहिती डोंगळे यांनी दिली.