Nirgudsar News : ‘‘आम्हाला अनुदानाची कुबडी नको आहे, तर कष्टाच्या घामाचा दर मिळायला हवा. आम्हाला दुधाला सरसकट ३५ रुपये दर द्यावा. अनुदान देऊन आमची थट्टा करू नये,’’ अशी संतप्त प्रतिक्रिया दूध उत्पादक शेतकऱ्यांकडून व्यक्त होत आहे. राज्यातील दूध उत्पादक शेतकऱ्यांना खासगी व सहकारी दूध संघ ३० रुपये प्रति लिटर दूधदर देऊन अवघे तीन महिने उलटले नाही, तर १ ऑक्टोबरपासून प्रत्यक्ष प्रति लिटर २ रुपयांनी दर कमी करून २ रुपये अनुदानात वाढ करण्याचे सरकारने जाहीर केले आहे.

राज्यातील दुग्ध उत्पादक शेतकऱ्यांना खासगी व सहकारी दूध संघ प्रति लिटर ३.५ फॅट आणि ८.५ एमएसएफ साठी ३० रुपये दर व राज्य सरकार ५ रुपये अनुदान असे एकूण ३५ रुपये प्रति लिटर दर सरकारने जाहीर केला. हा दर शेतकऱ्यांना १ जुलैपासून देण्याची घोषणा राज्याचे दुग्धविकासमंत्री राधाकृष्ण विखे पाटील यांनी केली. मात्र शेतकऱ्याचा पदरात हा दर उशिराच पडला. अद्यापही काही शेतकऱ्यांना अजून मिळालेला नाही.