New Delhi News: भारतीय अंतराळ संशोधन संस्थेचे (इस्रो) माजी अध्यक्ष के. कस्तुरीरंगन (वय ८४) यांचे शुक्रवारी बंगळूरमध्ये प्रदीर्घ आजाराने निधन झाले. गेल्या काही महिन्यांपासून वृद्धत्वाशी संबंधित तक्रारींचा ते सामना करत होते.

आज सकाळी बंगळूर येथील आपल्या निवासस्थानी त्यांनी अखेरचा श्वास घेतला. त्यांचे पार्थिव रमन रिसर्च इन्स्टिट्यूट येथे अंत्यदर्शनासाठी ठेवण्यात येणार असून रविवारी (ता.२७) त्यांच्यावर अंत्यसंस्कार करण्यात येतील. केरळमधील एर्नाकुलम येथे २४ ऑक्टोबर १९४० रोजी सी.एम. कृष्णास्वामी अय्यर आणि विशालाक्षी या दांपत्याच्या पोटी त्यांचा जन्म झाला. त्यांनी १९९४ ते २००३ दरम्यान नऊ वर्षे ‘इस्रो’चे अध्यक्ष म्हणून काम पाहिले होते. अंतराळ संशोधनातील अमूल्य योगदानाबद्दल त्यांना पद्‌मश्री, पद्‌मभूषण व पद्‌मविभूषण पुरस्कारानेही सन्मानित करण्यात आले होते.

‘इस्रो’च्या अध्यक्षपदाबरोबरच कस्तुरीरंगन यांनी राष्ट्रीय शिक्षण धोरणाच्या मसुदा समितीचे अध्यक्ष म्हणूनही काम पाहिले होते. ते कर्नाटक ज्ञान आयोगाचे अध्यक्ष तसेच जवाहरलाल नेहरू विद्यापीठाचेही कुलगुरू होते. त्याचप्रमाणे ते राज्यसभेचे तसेच नियोजन आयोगाचेही सदस्य होते. बंगळूरमधील नॅशनल इन्स्टिट्यूट ऑफ ॲडव्हान्सड स्टडीजचे ते २००४ ते २००९ दरम्यान संचालक होते.