Solapur News : उजनी आणि वीर धरणातून सोडण्यात आलेल्या पाण्याच्या विसर्गामुळे पंढरपुरात चंद्रभागा नदी दुथडी भरून वाहत आहे. परंतु योग्य नियोजनामुळे पंढरपुरातील चंद्रभागेची पाणीपातळी ओसरत आहे.

साधारण एक ते दीड फुटाने नदीची पाणीपातळी कमी झाली आहे, परिणामी, पंढरपुरातील संभाव्य पुराचा धोका सध्यातरी टळला आहे. मागील आठवड्यात पुणे जिल्ह्यात मुसळधार पाऊस झाला होता. त्यामुळे उजनी धरण ७६ टक्के भरले.

त्यामुळे उजनी धरणातून भीमेत आणि वीर धरणातून नीरेत सोडलेल्या पाण्यामुळे ऐन आषाढी यात्रेत चंद्रभागेला पुराची शक्यता निर्माण झाली. पण ही परिस्थिती टाळण्यासाठी जलसंपदा विभागाने उजनीतून पाणी सोडण्याचा निर्णय घेतला.

त्यानुसार दौंडकडून उजनीत येणारा विसर्ग आणि पुढे धरणातून भीमा नदीत सोडावा लागणारा विसर्ग किती असावा, यांचा अंदाज घेऊन पाणी सोडण्यास सुरुवात केली. त्यानुसार टप्प्याटप्प्याने दोन्हींचा विसर्ग नियंत्रित केला गेल्याने पंढरपुरातील पूराचा धोका सध्या टळला आहे.

शुक्रवारी (ता.२७) पाण्याचा विसर्ग कमी- कमी करत आणला. दौंडकडून उजनीकडे येणारा विसर्ग ९९३६ क्युसेक इतका होता. तर पुढे नदीत येणारा विसर्ग केवळ ६६०० क्युसेक इतका होता. त्यामुळे परिस्थिती नियंत्रणात आली आहे.

उजनीत ७० टक्के पाणीसाठा

उजनी धरणाची एकूण पातळी शुक्रवारी (ता.२७) ४९५.३६० मीटरपर्यंत राहिली. तर पाण्याचा एकूण साठा १००.८७ टीएमसी आणि त्यापैकी उपयुक्त साठा ३७.२१ टीएमसी एवढा राहिला, तर या पाण्याची टक्केवारी ६९.४५ टक्के इतका राहिली.