Buldhana News : संग्रामपूर तालुक्यात तीन दिवसांपूर्वी काटेल कोलद शिवारात अवैध वाळू उपसा करणाऱ्या ट्रॅक्टरने धडक दिल्याने कोतवालाचा मृत्यू झाला होता. मृत्यू झालेला कोतवाल अत्यंत सामान्य कुटुंबातील असल्याने या कुटुंबाला तालुक्यातील कृषी अधिकारी, कर्मचाऱ्यांनी आर्थिक मदत दिली. ही मदत शनिवारी (ता. २०) कुटुंबाकडे सुपूर्द करण्यात आली.

एकलारा गावातील लक्ष्मण अस्वार हे कोतवाल म्हणून कार्यरत होते. तीन दिवसांपूर्वी रात्री काटेल कोलद शिवारात वाण नदीपात्रातून वाळूचा उपसा सुरू असल्याची माहिती मिळाल्याने ते महसूल पथकासह तेथे गेले होते.

अवैध उपशाला पायबंद घालण्यासाठी पथकाने कारवाई करण्याचे धाडस केले. या वेळी ट्रॅक्टर चालकाने कोलवात अस्वार यांच्या अंगावर ट्रॅक्टर घातला. यात ते गंभीर जखमी झाले होते. त्यांना तातडीने अकोला येथे औषधोपचारासाठी भरती केले गेले. मात्र, तेथे त्यांचा मृत्यू झाला.

अस्वार हे अत्यंत सामान्य कुटुंबातील होते. कुटुंबाची आर्थिक परिस्थिती लक्षात घेता तालुका कृषी अधिकारी अमोल बनसोडे यांनी पुढाकार घेत आर्थिक मदत गोळा केली. ही मदत शनिवारी (ता. २०) तालुका कृषी अधिकारी कार्यालयातील कर्मचारी, अधिकाऱ्यांनी भेट देऊन सुपूर्द केली. या वेळी गावातील नागरिक उपस्थित होते.