Nandurbar News : खानदेशातील अनेक भागांत उशिराने लागवड करण्यात आलेल्या कापसाची वेचणी आता अंतिम टप्प्यात आहे. मात्र वेचणीसाठी मजूर मिळत नसल्याने शेतकऱ्यांना अधिकची मजुरी द्यावी लागत असून, यात वेचणी झालेल्या कापसाच्या एकूण उत्पन्नातील निम्मे उत्पन्न मजुरांच्या हिश्श्यावर जात आहे.

एक क्विंटल कापसाची वेचणी केल्यास त्यातील निम्मा कापूस मजुरांचा असा फॉर्म्युला शेतमालक व मजुरांत होत आहे. मागील महिन्यात हा प्रकार सुरू झाला. आता काही शेतकऱ्यांचाच कापूस शेतात आहे. परंतु हा फिप्टी - फिप्टी फॉर्म्युला कायम आहे.

शेतकरी आणि मजुरांमध्ये आलेल्या एकूण उत्पनातून वाटणी होत असल्याने शेतकऱ्यांना कापूस प्रतिक्विंटल तीन हजार रुपये पडत असल्याचे सांगण्यात येत आहे. आशात कापूस पिकाला लागलेला खर्चही काढणे अवघड झाले आहे. तळोद्यातील हा फॉर्म्युला खानदेशातील सातपुड्यालगच्या अनेक गावांत पोचला आहे.

काही शेतकऱ्यांनी मात्र यास विरोध केला असून, यात शेतकऱ्यांचा तोटा आहे. हा चुकीचा प्रकार आहे, असा मुद्दा उपस्थित केला आहे. खानदेशात मजूरटंचाई कायम आहे. पुढे उष्णता वाढेल. या कालावधीत अधिकची मजूरटंचाई असेल.

दुहेरी फटका

नोव्हेंबर व अन्य कालावधीत झालेल्या अवकाळी पावसामुळे खानदेशात कापूस पिकाचे मोठे नुकसान झाले आहे. अशात रब्बीची तयारी शेतकऱ्यांनी केली. जेवढा येईल तेवढा कापूस काढून शेताची मशागत करून उन्हाळ पिकेही पेरली आहेत. फिफ्टी-फिफ्टीच्या फॉर्म्युल्यामुळे शेतकऱ्यांना मोठा आर्थिक फटका बसला आहे.

मशागत, बियाणे, मजुरी, खते, फवारणी, वेचणी या सर्वांची बेरीज करता कापूस पिकात शेतकऱ्यांना कुठलाही आर्थिक लाभ होणार नसल्याची स्थिती असून, पीक तोट्यात गेले आहे. दुसरीकडे निसर्ग फटका देत आहे. यामुळे शेतकरी हवालदील झाल्याची स्थिती आहे.