Cotton Picking : कापसाच्या वेचणीत मजूरटंचाईची समस्या

Jalgaon News : कापूस वेचणीसाठी मजूर मिळत नसल्याने शेतातच कापसाचे उंदीर व अन्य किटक नुकसान करीत आहेत. यात कापसाचा दर्जाही खराब होत आहे. शेतकरी कमी दर व मंजूरटंचाईला वैतागले आहेत.

खानदेशात शेतकऱ्यांनी कापसाची सर्वाधिक साडेआठ लाख हेक्टरवर लागवड केली आहे. सुरवातीला कमी पाऊस होता. त्यात नुकसान झाले. नंतर बेमोसमी पावसामुळे कापूस भिजला. दिवाळीनंतर मजूरटंचाई सुरू झाली. पुढे मजुरांनी कापूस वेचणीकडे पाठ फिरवली.

सद्यःस्थितीत एकाच वेळी अनेक भागात शेतीकामे सुरू आहेत. त्यात हरभरा, मक्यात तणनियंत्रण व इतर कामे सुरू आहेत. मजूरटंचाई कायम आहे. परिणामी २० रुपये किलो वेचणीचा दर देऊनही मजूर मिळत नसल्याची स्थिती आहे.

चोपडा, यावल, रावेर, धुळ्यातील शिरपूर, नंदुरबारातील शहादा, तळोदा भागात सातपुड्यातून मजूर येतात. त्यांची ने-आण करण्यासाठी शेतकऱ्यांना प्रतिमाणसी ५० ते ६० रुपये खर्च करावा लागतो. कापसाचे दर मात्र सतत कमी झाले आहेत.

यामुळे आर्थिक नुकसान होत असल्याचे शेतकऱ्यांनी सांगितले. कमी दर्जाच्या कापसाला व्यापाऱ्यांकडून कमी दर दिला जात आहे. शासकीय खरेदी केंद्रात कमी दर्जाचा कापूस घेतला जात नाही. यामुळे शेतकऱ्यांची चोहोबाजूने कोंडी झाली आहे.

कापूस वेचणी परवडेना

कापूस वेचणीचे काम आता अडचणीचे व अधिक श्रमाचेही आहे. कारण बोंडे व्यवस्थित काढता येत नाहीत. वेळ अधिक लागतो. शिवाय २० रुपये प्रतिकिलो दरात कापूस वेचणी परवडत नाही, असे मजूर म्हणतात.

आठ ते १० दिवस सतत विनवण्या करूनही मजूर शेतात कापूस वेचणीला येत नाहीत. त्यांना अधिकची मजुरी देण्याचे आश्वासन दिल्यानंतर ते येतात. दुपारी अनेकदा त्यांना वेळेआधी घरी सोडावे लागते. यात शेतकऱ्यांचे वित्तीय नुकसान होत आहे, असे सांगण्यात आले.