Chandrapur News : जिल्हा परिषदेच्या कृषी विभागाने खरीप हंगामाच्या पार्श्वभूमीवर जिल्ह्यातील कृषी केंद्रांतून खते, बियाणे आणि कीटकनाशकांचे नमुने तपासणीसाठी घेतले होते. ते नागपूर आणि अमरावतीच्या प्रयोगशाळेत तपासणीसाठी पाठविण्यात आले होते.

जिल्हा परिषद कृषी विभाग, जिल्हा अधीक्षक कृषी विभागातील गुणनियंत्रक विभागाच्या माध्यमातून खते, बियाणे आणि कीटकनाशकांचे नमुने तपासणीसाठी घेतले जातात. बाराही महिने ही मोहीम चालते.

शेतकऱ्यांच्या दृष्टीने महत्त्वाच्या असलेल्या खरीप हंगामात ही मोहीम अधिक तीव्र होते. जिल्हाभरात दीड हजारांवर कृषी केंद्रे आहेत. खरीप हंगामाच्या पार्श्वभूमीवर जिल्हा परिषदेतील कृषी विभागाने गुणनियंत्रक विभागाच्या माध्यमातून खतांचे शंभर, बियाणे २०० आणि कीटकनाशकांचे ३५ नमुने तपासणीसाठी घेतले होते.

बियाणे नागपूर तर खते अमरावती येथील प्रयोगशाळेत तपासणीसाठी पाठविण्यात आले होते. महिनाभरात त्याचा अहवाल येणे अपेक्षित होते. मात्र, या कालावधीत जिल्हा परिषदेतील कृषी विभाग, पंचायत समित्यांतील कृषी विभागाकडून खते, बियाणे आणि कीटकनाशकांच्या तपासणीचे काम काढून टाकण्यात आले होते. त्यामुळे जिल्हा परिषदेच्या कृषी विभागाने घेतलेल्या नमुन्यांच्या तपासणीला ब्रेक लागल्याची माहिती आहे.

नवीन योजनांचे गाजर

जिल्हा परिषदेच्या कृषी विभागाकडे पूर्वी कृषी केंद्र परवान्याचे काम होते. मात्र, तीन-चार वर्षांपूर्वी हे काम काढून टाकण्यात आले. आता खते, बियाणे आणि कीटकनाशकांचे नमुने घेण्यावरही राज्य शासनाने बंदी घातली आहे. नवीन योजना देणार असल्याचे कृषी विभागाला सांगण्यात आले आहे. मात्र, अजूनही कृषी विभागाला नवीन योजना मिळाल्या नाहीत. त्यामुळे कृषी विभागात नाराजीचा सूर आहे.