Amaravati News : बियाणे व निविष्ठा खरेदीत होणारी फसवणूक टाळण्यासाठी शेतकऱ्यांनी अधिकृत दुकानातूनच या साहित्याच्या खरेदीवर भर द्यावा, असे आवाहन तिवसा तालुका कृषी अधिकारी हेमलता इंगळे यांनी केले.

जिल्हास्तरीय खरीप आढावा बैठकीनंतर त्यांनी तिवसा तालुक्‍यातील खरीप लागवड क्षेत्र व इतर नियोजन याबाबतची माहिती दिली त्या म्हणाल्या, खरीप हंगाम तोंडावर असल्याने शेतकऱ्यांची बियाणे व खते खरेदीची लगबग वाढली आहे. तिवसा तालुक्‍यात सुमारे ४० हजार ४१० हेक्‍टरवर विविध पिकांखालील क्षेत्र प्रस्तावीत आहे.

निविष्ठा खरेदीत गैरप्रकार आणि फसवणूक होण्याची शक्‍यता पाहता शेतकऱ्यांनी अधिकृत व्यवसायीकांकडून याची खरेदी करीत पक्‍के बिल घेतले पाहिजे. त्याआधारे कोणतीही फसवणूक झाल्यास दाद मागणे शक्‍य होते. खते किंवा इतर निविष्ठा खरेदीत लिंकिंग होत असल्यास त्याबाबतची तक्रार कृषी विभागाकडे करण्यात यावी. याद्वारे संबंधितावर कारवाई शक्‍य होणार आहे. बोगस निविष्ठांवर वॉच ठेवण्यासाठी भरारी पथकाची निर्मिती करण्यात आली आहे.=

...अशी आहे बियाणे मागणी

बियाणे बदल दरानुसार सोयाबीन ५११३ क्‍विंटल, बीटी कापूस १५ हजार पाकिटे व इतर बियाणे ५६९ क्‍विंटल लागणार आहे. त्यासोबतच युरिया २४७८, डीएपी १४८७, एमओपी ३१६, एसएसपी ३१२२, मिश्र खते ३१२७ अशी एकूण १० हजार ५६ टन रासायनिक खतांची मागणी आहे.