Kolhapur News: शक्तिपीठ महामार्ग पूर्ण रद्द व्हावा, या मागणीसाठी शक्तिपीठ महामार्ग विरोधी संघर्ष समितीतर्फे शुक्रवारी (ता. २४) जिल्हाधिकारी कार्यालयासमोर धरणे आंदोलन करण्यात आले.

प्रसंगी रक्त सांडू, पण महामार्ग होऊ देणार नाही, असा इशारा आंदोलकांनी दिला. या वेळी आंदोलकांनी ‘शक्तिपीठ महामार्ग रद्द झालाच पाहिजे’, ‘शेतकरी एकजुटीचा विजय असो’, ‘पर्यावरणविरोधी महामार्ग रद्द झालाच पाहिजे’, ‘शेती वाचवा, देश वाचवा’, अशा घोषणा दिल्या.

महामार्गाला विरोधासाठी शेतकरी मोठ्या संख्येने एकवटले होते. समितीचे निमंत्रक गिरीश फोंडे, सम्राट मोरे, शिवाजी मगदूम यांच्या नेतृत्वाखाली सकाळी अकराच्या सुमारास धरणे आंदोलन सुरू करण्यात आले.

या वेळी आंदोलकांनी जोरदार घोषणाबाजी करत या महामार्गाविरोधात आवाज बुलंद केला. या वेळी समितीच्या शिष्टमंडळाने जिल्हाधिकारी अमोल येडगे यांची भेट घेऊन निवेदन दिले. प्रकाश पाटील, आनंदा देसाई, दादासाहेब मगदूम आदींसह शेतकऱ्यांनी सहभाग घेतला.