Amaravati News : स्व. बाळासाहेब ठाकरे कृषी व्यावसायिक व ग्रामीण परिवर्तन (स्मार्ट) प्रकल्पाच्या माध्यमातून शेतकरी आता उद्योजक बनू लागला आहे. शेतीमाल व फळपिकांवर प्राथमिक व दुय्यम प्रक्रिया उद्योग उभारून शेतकऱ्यांना वस्तू उत्पादन करणे आणि बाजारपेठेत विपणन करण्याची सुविधा या प्रकल्पाने उपलब्ध करून दिली आहे.

यामुळे शेतकरी आता स्वतः बाजारपेठेत स्वतः उत्पादित केलेल्या उत्पादनाचे दर ठरवू व विक्री करू लागला आहे. स्मार्ट प्रकल्पांतर्गत अमरावती जिल्ह्याला ३७ शेतकरी उत्पादक कंपनी स्थापण्याचे उद्दिष्ट देण्यात आले आहे. यातील २८ शेतकरी उत्पादक कंपन्यांना मंजुरी देण्यात आली आहे. पहिल्या टप्प्यातील मंजूर कंपन्यांपैकी १० कंपन्यांचे बांधकाम पूर्ण झाले असून उर्वरित १० चे बांधकाम प्रगतिपथावर आहे.

शेतकऱ्यांना उद्योजक बनविणे हा स्मार्ट प्रकल्पाचा खरा उद्देश आहे. त्यासाठी शेतकऱ्यांनी गटाने स्वतःची शेतकरी उत्पादक कंपनी स्थापून त्या माध्यमातून शेतीमालावर प्राथमिक व दुय्यम प्रक्रिया करून उत्पादन निर्मित करावे. त्याच्या विक्रीसाठी बाजारपेठ उपलब्ध करून देण्याची सुविधा स्मार्ट प्रकल्पांतर्गत करून देण्यात आली आहे.

विविध अन्नधान्य, कडधान्य, गळीतधान्य व फळपिकांवर प्राथमिक प्रक्रियेचे तसेच दुय्यम प्रक्रियेचे उद्योग उभारून शेतकऱ्यांना उद्योजकांच्या पंक्तीत आणण्याचा प्रयत्न आहे. यात चांगले यश आले असून काही शेतकरी उत्पादक कंपन्यांनी कोट्यवधींचा व्यवसाय केला आहे. मोर्शी तालुक्यातील हिवरखेड येथील कृषी प्रेन्यूअर शेतकरी उत्पादक कंपनीने यावर्षी संत्राफळांचा व्यवसाय केला आहे.