Beed News : शेतकऱ्यांनी उत्पादनापुरते मर्यादित न राहता प्रक्रिया उद्योग व निर्यातीवर भर द्यावा, असा सल्ला बीडच्या ‘आत्मा’चे प्रकल्प संचालक सुभाष साळवे यांनी दिला. सहकार व पणन विभागाअंतर्गत आशियाई विकास बँक अर्थसाहाय्यित महाराष्ट्र ॲग्री बिझनेस नेटवर्क (मॅग्नेट) प्रकल्पाअंतर्गत विभागीय प्रकल्प अंमलबजावणी कक्ष, लातूर, महाराष्ट्र सहकार विकास महामंडळ पुणे व कृषी विभाग व आत्मा विभाग बीड व कृषी विज्ञान केंद्र, खामगाव यांच्या संयुक्त विद्यमाने ‘मोसंबी उत्तम कृषी पद्धती प्रशिक्षण वर्गा’चे आयोजन कृषी विज्ञान केंद्र, खामगाव (ता. गेवराई) येथे शुक्रवारी (ता. २७) करण्यात आले होते.

त्या वेळी श्री. साळवे बोलत होते. व्यासपीठावर लातूरचे ‘मॅग्नेट’चे विभागीय प्रकल्प अधिकारी गणेश पाटील, सहकार विकास महामंडळ पुणेचे मनुष्यबळ विकास तथा वरिष्ठ प्रशिक्षण अधिकारी हेमंत जगताप, महाराष्ट्र, कृषी विज्ञान केंद्र खामगावच्या वरिष्ठ शास्त्रज्ञ तथा प्रमुख डॉ. दीप्ती पाटगावकर, मोसंबी संशोधन केंद्र, बदनापूरचे प्रभारी अधिकारी डॉ. संजय पाटील, उपप्रकल्प संचालक आत्मा सूरज पाटील, उपविभागीय कृषी अधिकारी शिवप्रसाद संगेकर, ॲग्रीप्लास्ट कंपनीचे सोमनाथ जाधव, कन्सल्टंट मॅग्नेट गजेंद्र नवघरे, सामाजिक समावेशन व लैंगिक समानता अधिकारी मॅग्नेट अक्षय हातागळे आदींची उपस्थिती होती.

या वेळी गणेश पाटील यांनी, मोसंबी उत्पादक शेतकऱ्यांना मॅग्नेट प्रकल्पाअंतर्गत असणाऱ्या संधी व मॅग्नेट प्रकल्पाची तसेच मोसंबी पिकाबरोबरच इतर पिकांचे मार्केटिंग व्यवस्थापन व ग्लोबल गॅप प्रमाणिकरण याविषयी सविस्तर माहिती दिली.

हेमंत जगताप यांनी प्रास्ताविक केले. डॉ. संजय पाटील यांनी मोसंबी पीक लागवड तंत्रज्ञानातील विविध बारकावे समजावून सांगितले व जातींची सविस्तर माहिती दिली. डॉ. दीप्ती पाटगावकर यांनी मोसंबी पिकांचे काढणी पश्चात तंत्रज्ञान याविषयी मार्गदर्शन केले. डॉ. श्रीकृष्ण झगडे, सोमनाथ जाधव, श्री. हातागळे यांनी मार्गदर्शन केले. सुमारे १३० हून अधिक शेतकऱ्यांनी सहभाग नोंदवला. हेमंत जगताप यांनी आभार मानले.