Chandrapur News : गेल्या काही दिवसांपासून सुरू असलेल्या पावसाने शेतकरी सुखावला आहे. जिल्ह्यात आतापर्यंत तीन लाख ८६ हजार ५६१ हेक्टर क्षेत्रांवर पेरण्या झाल्या आहेत. पाऊस बऱ्यापैकी असल्याने पीक परिस्थितीही उत्तम असल्याचे कृषी विभागाने सांगितले.

जिल्ह्यात खरीप हंगामात प्रामुख्याने धान, कापूस, सोयाबीन आणि तुरीचे पीक मोठ्या प्रमाणावर घेतले जाते. यंदा सुरुवातीपासून चांगला पाऊस राहील, असा अंदाज हवामान खात्याने व्यक्त केला होता.

जून महिना लागताच जिल्ह्यातील काही भागांतच थोडाबहुत पाऊस झाला. याच पावसाच्या भरोवशावर शेतकऱ्यांनी पेरण्या उरकल्या. मात्र, त्यानंतर पावसाने उसंत दिली होती. त्याचा परिणाम काही भागांतील शेतकऱ्यांना दुबार पेरणी करावी लागली होती.

मात्र, जुलै महिना लागताच पावसाने आपला रंग दाखविला. सहा ते दहा जुलै या कालावधीत जिल्ह्यात मुसळधार पाऊस झाला. या पावसाने रखडलेल्या पेरण्यांनी वेग घेतला. जिल्ह्यात खरीप हंगामाचे सर्वसाधारण क्षेत्र साडेचार लाख आहे. त्यापैकी तीन लाख ८६ हजार ५६१ क्षेत्रांवर आतापर्यंत पेरण्या झाल्या आहेत.

पीक क्षेत्र

धान १,०४४९५

तूर २८,९२४

सोयाबीन ५५८९५

कापूस १९०६३९