Ahilyanagar News: अहिल्यानगर शहरातील जमीयतुल कुरैश समाजाची बेपारी मोहल्ला झेंडीगेट येथे जिल्हास्तरीय बैठक झाली. या बैठकीत एकमुखाने सर्व समाज बांधवांनी जनावरांच्या खरेदी-विक्रीचा व्यापार बंद करण्यात आला असल्याचा निर्णय घेतला आहे. या निर्णयाचे समाज बांधवांनी स्वागत करत येणाऱ्या काळात समाजातील व्यक्ती जनावरांचा व्यापार करणार नसल्याचे बैठकीत घोषित करण्यात आले आहे.

अधिकृत परवानगी असणारी जनावरे खरेदी विक्रीसाठी नेत असताना देखील काही संघटनांनी जमीयतुल कुरैश समाजाला जाणून-बुजून लक्ष्य केले जात आहे. पोलिस प्रशासनाला चुकीची माहिती देऊन कोणताही पुरावा नसताना खोटे गुन्हे दाखल करण्याचे काम करत आहेत. कायद्याने मान्यता प्राप्त जनावरे आणली तरी त्रास होत आहे.

संपूर्ण जिल्ह्यात चालू असलेल्या गोहत्येच्या नावाखाली तथाकथित गोरक्षकांकडून दहशत केली जात आहे. कुरैशी समाजातील व्यक्तींनी व्यापारासाठी आणलेली जनावरे ही कत्तलीसाठी घेऊन जात असल्याचा खोटा आरोप केला जात आहे. पोलिसांच्या ताब्यात देऊन मारहाण करून पैसे काढून गुन्हे दाखल होत आहेत.

वाहने व साहित्य जप्त होत असल्याने कुरेशी समाजाचे मोठे नुकसान होत आहे. त्यामुळे कुरेशी समाज हा जनावरांची खरेदी-विक्रीचा व्यवसाय बेमुदत बंद करत असल्याचे स्पष्ट करण्यात आले.शेतकऱ्यांची भाकड जनावरे जी दूध देत नाही, काम करत नाही हे फक्त खाटीकांशिवाय कोणीच विकत घेत नाही. कायद्याने मान्यता प्राप्त त्या जनावरांना हे पैसे देऊन जनावरे खरेदी करतात.

मात्र काही संघटनेचे लोक खाटीकांना मारहाण करून त्यांच्याकडून पैसे घेतात. रीतसर कागदपत्रे असताना देखील अडवत आहेत. त्यामुळे संपूर्ण खरेदी-विक्रीचा व्यवहार बंद करून लवकरच संपूर्ण जिल्ह्यात समाजातर्फे शासनाला निवेदन देण्यात येणार असल्याचे देखील सांगण्यात आले. बैठकीत जिल्ह्यातील जमीयतुल कुरैश जमातचे पदाधिकारी व समाज बांधव मोठ्या संख्येने उपस्थित होते.