Sangli News : जिल्ह्यात रब्बी हंगामाची कृषी विभागाने तयारी केली आहे. यंदाच्या हंगामात कृषी विभागाकडून १३ हजार हेक्टरवर ज्वारीचे तर हरभऱ्याचे ३०० ते ४०० हेक्टरवर बीज प्रक्रिया करण्याचे प्रात्यक्षिक करण्याचे नियोजन केले आहे. त्यानुसार शेतकऱ्यांमध्ये जनजागृतीचे काम सुरू केले असल्याची माहिती कृषी विभागाने दिली.

जिल्ह्यात खरीप हंगामातील पिकांची काढणी सुरू आहे. येत्या पंधरा दिवसांत काढणी अंतिम टप्प्यात पूर्ण होईल. त्यामुळे रब्बी हंगामाची तयारी गेल्या आठ दिवसांपासून सुरू झाली आहे. खते आणि बियाण्यांची मागणी केली आहे. जत, आटपाडी, कवठेमहांकाळ तालुक्यांत रब्बी हंगामात प्रामुख्याने रब्बी ज्वारीची पेरणी लवकर सुरू होते. या तालुक्यांत ज्वारीची पेरणीही सुरू झाली आहे.

दरम्यान, ज्वारी पेरणीपूर्वी बीज प्रक्रिया प्रात्यक्षिके करण्याचे काम कृषी विभागाने सुरू केले आहे. शेतकऱ्यांच्या बांधावर जाऊन बीज प्रात्यक्षिके घेतली जात आहेत. त्यातून त्यांना मार्गदर्शन आणि लागवडीचे तंत्रज्ञानही सांगितले जात आहे.

त्यामुळे बियाण्यांची उगवणक्षमता समजण्यास मदत होत आहे. जिल्ह्यात ज्वारीचे १३ हजार हेक्टरवर बीज प्रात्यक्षिके घेण्यात येणार आहे. त्यासाठी १३०० क्विंटल बियाणे वाटपही केले आहे. हरभऱ्याचे ३०० ते ४०० हेक्टर तर करडईचे १२० हेक्टरवर बीजप्रक्रिया प्रात्यक्षिकही घेतले जाणार आहे.