Buldana News: ‘नाबार्ड’च्या नॅशनल ॲडाप्टेशन फंड फॉर क्लायमेट चेंज (एनएएफसीसी) या योजनेअंतर्गत हवामान बदल अनुकूल प्रकल्प चालवले जातात. त्‍यातून जिल्ह्यातील देऊळगावराजा तालुक्यात गेल्या काळात शेतकऱ्यांना सूक्ष्म सिंचनासाठी अनुदानित साहित्य वाटप करण्यात आले. मात्र, दोन ते अडीच वर्षांपासून या साहित्याचे अनुदान मिळाले नसल्याने शेतकरी त्रस्त झाले आहेत.

‘नाबार्ड’च्या पुढाकाराने दोन वर्षांपूर्वी देऊळगावराजा तालुक्यात नॅशनल ॲडाप्टेशन फंड फॉर क्लायमेट चेंज (एनएएफसीसी)योजनेची अंमलबजावणी करण्यात आली होती. यासाठी शेतकरी निवड करून त्यांना रीतसर पूर्वसंमती देण्यात आली. यंत्रणेमार्फत मोका तपासणी झाली. साहित्य खरेदी केल्यानंतर शेतकऱ्यांना अनुदानासाठी प्रस्ताव सादर करण्यात आला. मात्र अद्याप शेतकऱ्यांना छदामही मिळू शकलेला नाही. आपले अनुदान कधी येईल, कोण देईल या बाबत शेतकऱ्यांना कुठलीही माहिती मिळत नाही.

‘एनएएफसीसी’ योजनेतून कृषी, जलस्रोत आणि ग्रामीण विकास यासह विविध क्षेत्रांमध्ये हवामानातील लवचीकता आणि टिकाऊपणाला प्रोत्साहन देणाऱ्या प्रकल्पांवर लक्ष केंद्रित केले जाते. नाबार्ड या प्रकल्पांना पुनर्वित्त आणि इतर यंत्रणांद्वारे आर्थिक साहाय्य पुरवते. विविध उद्दिष्टांसह ग्रामीण भागावर लक्ष केंद्रित करीत ग्रामीण समुदायांसाठी लाभदायक ठरतील अशा प्रकल्पांना समर्थन दिले जाते. मात्र, योजना राबवल्यानंतर संबंधितांना अनुदान देण्यासाठी कुठलीही कार्यवाही अद्याप संबंधितांनी केली नाही. परिणामी लाभार्थी शेतकऱ्यांचे अनुदान अडकले आहे.