Fruit Orchard Subsidy: फळबाग अनुदान जाहीर, परंतु मिळणार केव्हा?

Nagpur News: बुरशीजन्य रोगांमुळे पाणी काटोल व नरखेड तालुक्यांत संत्रा व मोसंबीचे मोठे नुकसान झाले होते. या नुकसानीपोटी काटोल व नरखेड तालुक्यांसाठी ९ कोटी ५८ लाख रुपयांची वाढीव मागणी करण्यात आली होती. त्याला मंजुरीही प्रदान करण्यात आली. ही मदत शेतकऱ्यांच्या खात्यात जमा करावी, अशी मागणी राष्ट्रवादी काँग्रेस (शरदचंद्र पवार) पक्षाचे नेते मयूर उमरकर यांनी केली आहे.

काटोल व नरखेड तालुक्यांत सात महिन्यांपूर्वी अतिवृष्टीमुळे संत्रा व मोसंबीवर बुरशीजन्य रोगांचा प्रादुर्भाव झाला होता. यामुळे फळगळ झाली होती. तेव्हा सर्व्हे करून तो अहवाल शासनाला सादर करण्यात आला.

यानंतर विधानसभेच्या निवडणुकीपूर्वी काटोल तालुक्यासाठी १९ कोटी ४३ लाख रुपये, तर नरखेड तालुक्यासाठी २८ कोटी ८८ लाख, असे एकूण ४८ कोटी ३१ लाख रुपये मंजूर करण्यात होते. परंतु या सर्व्हेमधून अनेक संत्रा व मोसंबी उत्पादक सुटले होते. त्यासाठीचा प्रस्ताव तयार करून काटोल तालुक्यासाठी चार कोटी ७८ लाख रुपयांची, तर नरखेड तालुक्यासाठी ४ कोटी ८० लाख रुपयांची मागणी करण्यात आली आहे.